Промышленнай уокурукка хаарбах туруктаах дьиэ элбэх

2020 сыл барыбытыгар ураты буолбута. Дьокуускай куоракка эмиэ. Ол туһунан ааспыт нүөмэрдэрбитигэр суруйан турабыт. Ааспыт бээтинсэҕэ Дьаһалта отчуота Промышленнай уокурукка буолан ааста.

Нэһилиэнньэ ыйытыыларыгар уонна туһааннаах салаалар хоруйдарыгар кылгастык тохтоон ааһыаҕыҥ:

Биһиги хаарбах туруктаах дьиэҕэ олоробут – Дзержинскэй уул., 66/2. Мин 75 саастаах кырдьаҕас киһибин. Ипотеканы миэхэ ким да биэриэ суоҕа, ылар да баҕам суох. Мин эргэ дьиэм биир квадратнай миэтэрэтин сыаната төһө буолуой? Ол харчыга дьиэ сатаан ылбатым биллэр, ол аата хоруоп атыыластан өлөргө эрэ оҥосторум хаалар дуо? Хаһыаттарга аахтахха, мин дьиэм квардратнай миэтэрэтэ 28 000 солк. эрэ буолар диэн суруйаллар... 27 кв.м иэннээх дьиэлээхпин, ол харчыга тугу ылыахпыный? 1993 сылтан дьиэни бас билээччи буолабын.

Евгений Григорьев, Дьокуускай куорат баһылыгын эбээһинэһин толорооччу: Дьиэ-уот сыһыаннаһыыларын Департаменын дааннайынан, эһиги дьиэҕит 2022 сылга диэри көһөрүллэр диэн былааҥҥа турар.

Эн харчынан буолбакка, кыбартыыранан ылыахпын баҕарабын диэн сайабылыанньа суруйаҕын уонна күүтэҕин. Дьиэ-уот сыһыаннаһыыларын Департаменыгар оннук сайаапка киирдэ да үлэлииллэр. Онно туох да уустуга суох. Ол аата 2022 сылга диэри кыбартыыра биэриэхтээхпит.

***

Мин эмиэ ити дьиэҕэ олоробун. Ол эрээри кыбартыырам муниципальнай. Барыта сиҥнэн, тохтон түһэ турар, дьиэбит ортотунан хайдан эрэр. Тэллэй, кутуйах элбээбитин туһунан киһи этэ да барбат... Киһи олорор туругуттан ааста. Канализациябыт алдьанан, 1 миэтэрэлээх тарыҥ буолан тоҥон сытар. Батареялар нэһиилэ ыйанан тураллар, туллан түстүлэр да, дьиэттэн тахсыбат да буолабыт. Биһигини хайдах да 2021 сылга көһөрбөттөр дуо?

Евгений Григорьев: Эһигини хайдах да гынан эрдэ көһөрөр кыахпыт суох. 2022 сылтан 2021 сылга сыҕарытан биэрдибит. 2022 сылга саҕаланыахтаах хамсааһыннар бары быйыл саҕаланыахтара. Ол аата эһиги дьиэлэргитин кытта ыкса үлэ барыаҕа. Ким харчынан ылыан баҕарар суумаларын быһаарыахпыт. Оттон кыбартыыранан ылыаххытын баҕарар буоллаххытына, сокуоҥҥа олоҕуран, 2022 сыл ахсынньы 31 күнүгэр диэри саҥа дьиэлэниэххит.

2020 сыл бүтүөр диэри 2019 сыллааҕы дьон дьиэ ылбыттара. 2021 сылга 2020 сыллааҕылар ылан эрэллэр. Эһигини биир сыл сыҕарыттыбыт.

Муниципальнай кыбартыыраҕа харчынан ылбаккыт. Эрдэ приватизацияламматах буоллаххытына, муниципальнай кыбартыыраҕа олорон хааларгыт ордук.

Оттон мин саҥа дьиэни ылыахпын баҕарбат буоллахпына? Эргэ да дьиэҕэ көһүөхпүн баҕарабын. Билигин бу дьиэҕэ олорор кыаҕым суох.

Евгений Григорьев: Мин ону барытын өйдүүбүн. Ол эрэн федеральнай сокуонунан үлэлиибит.

Билигин эһигини маневреннай пуонда дьиэлэригэр көһөрүөхпүтүн сөп.

Маневреннай пуондаҕа көстөхпүнэ, үйэм тухары онно олоруом дии...

Оннук буолбатах. Былыргы шаблоннарынан толкуйдаамыахха.

***

Биһиги дьиэбитин маҕаһыын ууга ыытар. Дириэктэрдэрэ туохха да кыһаммат. Хаста да сулууспалары ыҥыран саахаллары тохтотон кэллибит.

Промышленнай уокурук салалтата: Дзержинскэй уул. 66/1 баар маҕаһыын хаһаайынын кытта кэпсэппиппит, сэрэтии биэрдибит. Сайын уу ситимин барытын уларытыах буолла.

***

Вячеслав Сидоров, Очиченко уул. 19 нүөмэрдээх дьиэтин олохтооҕо: Биһиги уокурукпут наһаа улахан. Кыбаарталы аахпатахха даҕаны, мас дьиэ элбэх. Ону таһынан наһаа элбэх чааһынай дьиэлээхпит. Куорат эбэтэр чааһынай бас билиигэ да буоллун, уопсастыбаннай баанньык-прачка комплекса сатаан тутуллуо дуо?

Евгений Григорьев: Дьокуускайга баары ылан көрдөххө, баанньыктары предпринимателлэр үчүгэйдик үлэлэтэллэр. Промышленнай уокурукка биир эмэ предприниматель бу эйгэҕэ үлэлэһиэн баҕардаҕына, биһиги сүүс бырыһыан өйүүрбүтүн биллэрэбин. Сир-уот докумуонун оҥортороругар көмөлөһүөхпүт. Промышленнай уокурук – куорат бөдөҥ оройуона, ол иһин баанньык тутулуннаҕына олохтоохторго туһалаах буолара биллэр. Маныаха препринимателлэр өттүлэриттэн көхтөөх буолуу наада.

***

Анна Габышева: Олунньу 10 күнүгэр Сэбиэскэй Аармыйа 50 сыла уул. 2-с нүөмэрдээх дьиэтигэр баһаар буолбута. Бастакы подьезка иккис этээс барыта умайда, бастакы этээстэр ууга бардылар. Дьон бас билэр баайа-дуола барыта буорту буолла. Туга да суох хааллыбыт. Кэлэктиибинэн биһиги дьиэбитин хаарбах диэн билинэллэригэр сайабылыанньа суруйбуппут. Ол сайабылыанньабыт төһө өр көрүллүөҕэй? 2021 сылга хаарбах дьиэттэн көһөрүү бырагырааматыгар хапсар кыахтаахпыт дуо? Күн бэҕэһээ экспертиза кэлэн барбыта, түмүгэ хаһан тахсыаҕай. Маневреннай пуондаттан Чернышевскай уул. баар оскуола эргэ дьиэтигэр уонна Лонгинова 58А биэриэхтэрин сөп эбит. Миэхэ, 4 оҕолоох соҕотох ийэҕэ, Лонгинов уулуссатыгар баар дьиэҕэ 16 квадратнай миэтэрэ биэрэллэр. Ол аата мин 4 оҕобун уонна төрөппүттэрбин кытта 7 киһи буолан, хайдах да кып-кыра хоско батан олорбоппут. Маннык балаһыанньаттан хайдах тахсабыт?

Евгений Григорьев: Маныаха биири чопчулуубут – бу баһаар иннинэ эһиги дьиэҕит хаарбах туруктаах буолбатах этэ. Билигин хаарбах туруктааҕынан билиниллибит дьиэни хайдах да гынан быйылгы көһөрүү бырагырааматыгар киллэрбэппит. Билигин куоракка 2012-2017 сылларга хаарбах туруктааҕынан билиниллибит дьиэлэри көһөртөөн эрэбит. Эһиги дьиэҕит көһөрүү үһүс уочаратыгар хапсар.

Маневреннай пуонда Дьокуускайга тиийбэт. Баар дьиэлэрбит уопсайдар, куорат кииниттэн олус ыраахтар, толору хааччыллыылара суохтар.

Маневреннай пуондаҕа көстөхпүтүнэ, оҕолорум оскуолалара наһаа ыраах буолар, онно биир эрэ оптуобус сылдьар. Билигин аймахтарбытыгар олоробут. Туох эмэ харчынан көмө баар дуо? Арай дьиэ куортамнаары гынар буоллахпытына...

Евгений Григорьев: Маневреннай пуондаттан ураты туох да көмө оҥорор кыахпыт суох. Билигин ИДьМ кытта сөбүлэҥ түһэристибит, Пирогов уул. 6/1 нүөмэрдээх дьиэтин биэриэхтээхтэр. Ону эмиэ өрөмүөннээн маневреннай пуонда оҥоһуллуохтаах.

Маннык балаһыанньа бүгүн эрэ үөскээтэ диэбэппит. Сылтан сыл аайы мунньуллубут, дьапталҕаланан испит кыһалҕа.

Хамыыһыйа эскпертизатын түмүгэ бу күннэргэ бэлэм буолуоҕа.

***

Станислав Тимофеев: 2020 сыл ахсынньы 19 күнүгэр “Ураса Молл” атыы-эргиэн киинэ арыллыбыта. Сотору Кыайыы Паарката арыллыахтаах. Кинилэр бэйэ-бэйэлэрин кытта олох ыкса, суол нөҥүө-маҥаа тураллар. “Гаражи” диэн оптуобус тохтобулун көһөрүү туһунан боппуруоһу көтөҕүөхпүт этэ. Биир өттүттэн атыы-эргиэн киинин иннигэр, атын өттүгэр  Кыайыы Пааркатыгар тохтобуллар тэриллиэ этилэр. Уонна икки ардыларыгар суолу туоруур сир оҥоһуллуон сөп этэ. Аны туран, атыы-эргиэн киинин иннигэр уонна Кыайыы Пааркатыгар улахан массыына тохтобуллара бааллар. Балартан көлөлөр суолга айаннаан да тахсалларыгар табыгастаах буолуо этэ.

Евгений Григорьев: Мин онно толору сөбүлэһэбин. Дьон тардыһар сирдэрэ баар буолуохтара. Ол иһин суол-иис ситимигэр баар тохтобуллары, туоруур сирдэри сыҕарытан биэрэр, дьоҥҥо табыгастаах өттүн таларбыт ордук. Кыайыы Паарката 2022 сылга тутуллан бүтүөҕэ. Парковканы оҥоруу түһүмэҕэр оптуобус тохтобулун көһөрөр тоҕоостоох буолуо этэ. Бу боппуруоһу ырытыһыахха наада. Суолга сэрэхтээх буолуу хамыыһыйатыгар көрүөхпүт. Бастатан туран, олохтоохтор интэриэстэрин учуоттуохтаахпыт.

***

М.В.Булдакова – Коммунально-строительнай техникум бэрэстэбиитэлэ: Биһиги иккитэ “Норуот бүддьүөтүгэр” кытынныбыт. Сквер уонна спортивнай балаһаакка туттубут. Промышленнай уокурук бу эбийиэктэри көрбөт-истибэт, биһиги бэйэбит күүспүтүнэн эмиэ кыаллыбат. Тупсарыы бырагырааматынан үлэ бөҕө ыытыллар, оттон норуот харчытыгар тутуллубут сквер көрүүтэ-истиитэ суох турар. Бу кыһалҕаны хайдах быһаарыахха сөбүй?

Евгений Григорьев: Промышленнай уокурук сиригэр турар сквери биир-биэс тыла суох көрүөхтээхтэр. Оттон спортивнай балаһаакканы Промышленнай уокурук бас билиэн наада.

Промышленнай уокурук бэрэстэбиитэлэ: Спортивнай балаһаакка уокурук балансатыгар суох. Техникум киэнэ эмиэ буолбатах. Манна уопсай тылы булуохпут дии саныыбын.

***

Сэбиэскэй Аармыйа уул., 86/2, 86/3, олохтоохторо: Биһиэхэ икки кутуу суоллаахпыт – хаһан да оҥоһуллубаттар, көрүллүбэттэр. 15-с оптуобус суол куһаҕан кэмигэр бүтэһик тохтобулугар да сатаан тиийбэт. Аны туран сырдатыы диэн олох суох. 3 остуолба баарыгар саатар икки сырдатар лаампаны ыйыыр тоҕо сатамматый? Уонна управа ыттары иитэр дьону сатаан дьаһайбат буоллаҕына, оптуобус биһиги дьиэбитигэр ыкса кэлэн тохтуура табыллыа дуо? Тоҕо диэтэххэ ыттартан куттанан киһи сатаан хаампат уулуссата буолла.

Евгений Григорьев: Уулуссаны сырдатыыга “Горсвет” аатыгар сорудахтыахпыт, билигин боротокуолга киллэриэхпит.

Суолу кутуу уонна грейдеринэн тэҥнээһин быйыл оҥоһуллуоҕа диэн Промышленнай уокурук салалтата эппиэттээтэ.

Промышленнай салалтата кэпсээбитинэн, ыт приюта кинилэр уокуруктарыгар баар буолан бэйдиэ сылдьар ыт наһаа элбэх, олохтоохтортон элбэх үҥсүү киирэр. Евгений Григорьев 15-с нүөмэрдээх оптуобус суолун ситэри уһатан биэриэххэ сөп диэтэ. Ыт сокуонун баһылык э.т. олоччу сыыһанан, дьиҥнээх олоххо табыгаһа суоҕунан ааҕарын эттэ.