Пляж хаһан аһыллыай?

Быйыл пляж үлэтин “Куорат баанньыктара” МУТ хааччыйар. Тэрилтэ салайааччыта Василий Поскачин кэпсээбитинэн, билигин сайыҥҥы сезоҥҥа бэлэмнэнэллэр, сөтүөлүүр сири ыраастыыллар, күрүөлэрин өрөмүөннүүллэр.   

Бу күннэргэ уу таһыма үрдээн, лабораторнай анаалыс кыайан ылыллыбат. Уу түстэҕинэ, СӨ Гигиенаҕа уонна эпидемиологияҕа киинигэр сайаапка бэриллиэҕэ. Пляж аһыллыар диэри водолазтар хайаан да уу түгэҕин чинчийиэхтэрэ.

«Уу уонна кумах анаалыһа Гигиена уонна эпидемиология киинигэр үс нэдиэлэ чинчийиллэр диэн бэлиэтээн этэбин. Ол эрэ кэнниттэн, этэҥҥэ буоллаҕына, пляһы аһар кыахтаахпыт. Техническэй өттүнэн ыллахха, үлэлииргэ бэлэммит, материальнай-техническэй хааччыллыы нуормаҕа уонна СанПин быраабылаларыгар эппиэттиир», – диэн “Куорат баанньыктара” МУТ салайааччыта иһитиннэрдэ.

Манна даҕатан эттэххэ, пандемия саҕаланыан иннинэ бу пляж сыл аайы бэс ыйын 20-с күннэригэр аһыллар буолара.