Оскуолаттан — вебдизайнердар уонна медбраттар

Кэлэр үөрэх дьылыттан Пригороднай сэлиэнньэтин оскуолатыгар эбии үөрэхтээһин хайысхата арыллар – веб-дизайн. Бу идэҕэ оҕолор 10-ус кылаастан саҕалаан икки сыл устата үөрэнэр буолуохтара. Аттестат ылалларыгар веб-дизайн кууруһун ааспыттарын туһанан сибидиэтэлистибэни илиилэригэр тутуохтара.

Маны таһынан Пригороднай оскуолатыгар “Мебдрат” идэтигэр такайар үөрэх бырагырааматын оҥорон эрэллэр.

Билигин Пригороднай оскуолатыгар олус ситиһиилээхтик спортивнай ориентирование кулууба үлэлиир. Маны таһынан  оскуола саҥа дьиэтигэр куорат үрдүнэн соҕотох анал хореография саалата үлэлиир.

2014 сыллаахтан физиканы уонна математиканы дириҥэтэн үөрэтэр хайысхалаахтар. 2021 сыллаахтан бэһис кылаастарга гуманитарнай, естественно-научнай, политехническэй хайысхалар  арыллыбыттара. 2020 сыллаахтан Цифровой үөрэхтээһин бырагырааматынан “Точка роста” үлэлиир. Аатырбыт математика учуутала Алесандр Чиряев оскуолатыгар сылы төгүрүччү үлэлиир үөрэх лааҕырын тэрийэр баҕа санаалаах.

Санатан эттэххэ, Пригороднай сэлиэнньэтигэр саҥа оскуола тутуута 2021 сыл ахсынньытыгар саҕаламмыта. Оскуолаҕа эбии дьиэни тутан  үлэҕэ киллэрии үөрэх тэрилтэлэригэр саҥа миэстэлэри таһаарар сыаллаах, ВЭБ.РФ судаарыстыбаннай корпорацияны кытта бииргэ үлэлэһии түмүгэр ситиһилиннэ. Тутааччы – “Арктик Капитал” хааччахтаммыт эппиэтинэстээх тэрилтэ.