Оскуола салҕааһынын 2023-с түөлбэҕэ тутуу быйылгыттан саҕаланыаҕа

Губинскай уокурук олохтоохторун иннигэр отчуокка олунньу 9 күнүгэр ол туһунан баһылык Евгений Григорьев 2023 сыллааҕы үлэтин түмүгүнэн отчуотугар иһитиннэрдэ. 

Баһылык 2023 сыллаахха Губинскай уокурукка Ленин проспегын Хабаров уулуссатыттан Краснояров уулуссатыгар диэри учаастагар хапытаалынай өрөмүөн түмүктэммитин, Дзержинскэй, 12/3 аадырыска спорт балаһаакката тутуллубутун бэлиэтээтэ. Хаарбах дьиэттэн көһөрүү бырагырааматынан 27 дьиэттэн 107 киһи көһөрүллүбүт, Северная, 2 уонна Дзержинскэй, 24/8 аадырыстарга турбут икки хаарбах дьиэ көтүрүллүбүт. Губин, 15, 17 уонна 19 дьиэлэр олохтоохторо бары көһөрүллүбүттэр, салгыы Губин уул.,15 көтүрэр үлэ саҕаламмыт.
Роман Дмитриев аатынан кытылы тупсарыы үлэтэ, Олохтоох көҕүлээһиннэр өрөспүүбүлүкэтээҕи бырагыраамаларынан Рыжиков аатынан сквер өрөмүөннэнэр, Иитээччи скверин бастакы уочаратын тутуу, Губин уул., 5/2 тиэргэнин тупсарыы саҕаламмыт.

Үүммүт 2024 сылга уокурукка Богдан Чижик уулуссатын Богатырев уулуссатыттан Кальвица уулуссатыгар диэри (2026 сылга түмүктэнэр), Хабаров уулуссатын Ярославскай уулуссатыттан Богатырев уулуссатыгар диэри (2026 году), Богатырев уулуссатын Дзержинскэй уулуссатыттан Хабаров уулуссатыгар диэри (2025 сылга түмүктэнэр), Бестужев-Марлинскай уулуссатын Богдан Чижик уулуссатыттан Хабаров уулуссатыгар диэри кэрчиктэрин хапытаалынай өрөмүөнүн саҕалыыр сорук турар. Маны сэргэ Набережнай уулуссатын бастакы уочаратын уонна Роман Дмитриев аатынан суолу саҥардан оҥоруу саҕаланыаҕа. Хаарбах дьиэттэн көһөрүү бырагырааматынан 10 дьиэттэн 39 киһи саҥа дьиэҕэ көһүөҕэ.

Роман Дмитрев аатынан суолу саҥардан оҥоруу болдьоҕун иннинэ 2023 сыллаахха Владимир Путин сорудаҕынан өрөспүүбүлүкэҕэ бэриллибит хааһына кирэдьиитин суотугар саҕаламмыта.

Евгений Григорьев маны сэргэ быйыл 203-с түөлбэ «Центр глобального образования» оскуолатыгар эбии тутуу барыахтааҕын туһунан этиитин мустубут дьон астына иһиттэ. Тутуу 2025 сылга түмүктэнэр. Уокурукка итини сэргэ дзюдоҕа уонна самбоҕа дьарыктыыр спорт саалата тутуллаары турар. 
Олохтоох көҕүлээһиннэр чэрчитинэн Иитээччи скверигэр фонтан оҥоһуллар. 202 түөлбэҕэ "202 дьоҕус оройуон" тохтобул куоракка айанныыр өттүгэр уонна "Поликлиника № 4" тохтобул Хабаров уулуссатыгар эргийэр өттүгэр сылаас тохтобуллар туруохтара.
Былааҥҥа Губин уул., 5/2 уонна Северная, 6 тиэргэннэрин тупсарыы  киирэн турар. 
Отчуот кэнниттэн олохтоохтор уокурукка көҕөрдүү үлэтин былаанын интэриэһиргээтилэр, 4 №-дээх поликлиника таһыгар массыына тохтуур сирэ, «сытар полицейскай» наадатын ыйдылар, суол, уулусса өрөмүөнүн ыйыталастылар, олорор дьиэлэр хапытаалынай өрөмүөннэрин, анал байыаннай дьайыы кыттыылаахтарыгар социальнай өйөбүл миэрэлэрин сурастылар, уопсастыбаннай тырааныспар үлэтин хаачыстыбатын тупсарарга баҕа санааларын эттилэр. Маны сэргэ нолуок сулууспата саҥа дьиэҕэ көстөҕүнэ (Дзержинскэй уулуссатыгар көһөр), дьиэни оҕо саадыгар эбэтэр оҕо сынньалаҥын тэрийэргэ туһанарга этии киллэрдилэр.