Оптуобуска уу харчынан төлөһөр ордук ночооттоох

Муус устар 1 күнүттэн куорат уопсастыбаннай тырааныспарынан айан төлөбүрүгэр уларыйыылар киирдилэр. 
Ол курдук, куорат иһинэн сылдьар оптуобустары ылан көрдөххө, «Спутник» каартанан, баан каарталарынан уонна уу харчынан төлөһүү туһааннааҕынан 3 солк., 4 солк. уонна 5 солкуобайынан үрдээтэ. Ол эрээри проездной билиэт сыаната уруккутунан хаалла. Инньэ гынан бүгүҥҥү күҥҥэ биир айан иһин 33 солк. төлөбүрдээх «Спутник», тырааныспар кумааһынньыктаах тынаарыспар уонна виртуальнай каарталар саамай барыстаах буоллулар. Ол эрээри проездной билиэт сыаната оннунан хаалла: 60 хонуктаах 40 уонна 60 айаннаах проездной билиэттэр сыаналара туһааннааҕынан – 950 солк. уонна 1300 солк., 30 хонуктаах 60 айаннаах билиэт – 1200 солк. (Тэҥнээн көрүүгэ: баан каартатынан биир айан – 40 солк., уу харчынан биир айан – 45 солк.) 
Куорат таһынааҕы оптуобустарга эмиэ уу харчынан төлөһүү саамай ороскуоттаах тарыып буолла, ол курдук бырайыас сыаната 7 солк. үрдээн, 85 солкуобайга тэҥнэстэ. 
Баан каартатынан төлөһө үөрэммит пассажирдарга эмиэ 2 солк. кээмэйдээх үрдээһин буолан, бырайыас сыаната 70 солк. тэҥнэстэ. «Спутник» электроннай тырааныспар каарталаахтарга тарыып уруккутунан – 66 солк. хаалла, проездной билиэт сыанатыгар эмиэ уларыйыы киирбэтэ. Санатар буоллахха, куорат кытыытынааҕы оптуобустарга биир ыйдаах проездной билиэт сыаната 2700 солк. тэҥнэһэр, Жатай бөһүөлэгэр тиийэ сылдьар проездной билиэт сыаната – 3100 солк.
Бэлиэтээн эттэххэ, оскуола үөрэнээччилэригэр 1-4 кылааска диэри куорат оптуобустарынан айан босхо. 5-11 кылааска үөрэнэр намыһах дохуоттаах ыаллар оҕолоро «Оскуола каартатынан» эмиэ босхо айанныыллар.