Онкология киинигэр каадырдары бэлэмнииллэр

Бүгүҥҥү күҥҥэ үлэлиир Өрөспүүбүлүкэтээҕи онкодиспансерга 500-тэн тахса исписэлиис үлэлиир. Билигин өссө 600-чэ исписэлиис, ол иһигэр быраастар, медсиэстэрэлэр, санитаркалар, инженердэр, оробуочайдар уо.д.а. наадалар. 2021 сылга 189 исписэлиис стажировкаланна, быйыл 9 ый иһигэр семинардарга, научнай быраактыка кэмпириэнсийэлэригэр 99 киһи дьарыктанна.

Ил Дархан Айсен Николаев иһитиннэрбитнэн, Москватааҕы А.С.Логинов аатынан клиникалаах наука киинин кытта ыкса сибээс олохтонно. Аан дойдуга киэҥник биллэр онколог-хирург Игорь Евгеньевич Хатьков биһиги исписэлиистэрбитигэр хас да төгүл искэни эпэрээссийэлээн көрдөрдө, үөрэттэ. Быйыл кини ахсынньы ыйга Дьокуускайга кэлэн, видеоэндоскопическай эпэрээссийэни оҥорууга маастар-кылааһы ыытыахтаах.

2022 сылга диспансерга 12 эдэр быраас, медицина орто анал үөрэхтээх 14 үлэһитэ эбилиннэ. Килииникэлээх ординатураҕа 26 быраас үөрэнэр. Итиэннэ Онкология киинигэр үлэлиир каадыры бэлэмнээһин бырагырааматынан, дойду үрдүк үөрэҕин кыһаларыгар 31 киһи үөрэнэр, орто медперсоналга – 27 киһи.  

Быйыл үрдүк үөрэх кыһаларыгар тус сыаллаах миэстэҕэ – 13, килииникэлээх ординатураҕа – 14, Дьокуускайдааҕы медицинскэй колледжка – 20 устудьуон киирдэ.