Онкология диспансера 12 улууска десант оҥорор былааннаах

СӨ Онкология диспансера искэн ыарыыны эрдэттэн быһаарыыга тиһиктээхтик үлэлиир. Диспансер быраастара быйыл өрөспүүбүлүкэ Алдан, Амма, Үөһээ Бүлүү, Горнай, Кэбээйи, Мэҥэ Хаҥалас, Нерюнгри, Ньурба, Өлүөхүмэ, Томпо, Уус Алдан, Уус Майа курдук 12 улууһугар сылдьан, искэн курдук уодаһыннаах ыарыыны эрдэтээҥҥи стадиятыгар быһаарар үлэни ыытар былааннаахтар.
Диспансер кылаабынай бырааһа Татьяна Николаева иһитиннэрбитинэн, быраастар биригээдэлэрэ номнуо Үөһээ Бүлүүгэ үлэлэрин түмүгүнэн 139 пациент бэрэбиэркэни ааспыт, онтон 15 киһиэхэ сиһилии Онкология диспансерыгар кэлэн чуолкай диагноһы туруортарарга ыҥырыы туттарыллыбыт. Муус устар 1-5 күннэригэр биригээдэ Уус Алдан улууһугар үлэлии бараары бэлэмнэнэр. Биригээдэ састаабыгар онкогинеколог, онкохирург, маммолог, эндоскопист, УЗИ бырааһа бааллар. Бэлиэтээн эттэххэ, быраастар десаннара дойду баһылыга Владимир Путин көҕүлээһининэн олоххо киллэриллэр «Доруобуйа харыстабыла» нацбырайыак чэрчитинэн үлэлиир, диэн иһитиннэрэр Ил Дархан уонна Бырабыыталыстыба пресс-сулууспата.