Олунньу ыйга киирэр уларыйыылар

Ийэ хапытаала үрдээтэ

Ийэ хапытаала олунньу ыйтан 11,9 бырыһыан индексацияланна. Биир оҕолоох ыалга 586 946,72 солк. уонна икки эбэтэр онтон кэлэр оҕо төрөөтөҕүнэ (ол иннинэ хапытаалы ыла иликтэргэ) –  775 628,25 солк. буолла.  

Бастакы оҕолоругар хапытаалы ылбыт дьоҥҥо иккис оҕо күн сирин көрдөҕүнэ эбии 188 681,53 солк. төлөнөр.

Босуобуйалар үрдээтилэр

11,9 бырыһыанынан үрдээбит атын босуобуйалар:

– Оҕо төрөөтөҕүнэ биирдэ бэриллэр төлөбүр;

– Оҕо көрөн олорууга ый аайы төлөнөр босуобуйа;

– Инбэлииттэргэ ыйдааҕы төлөбүр.

«Суверенитеттаах рунет»

Сибээс оператора өҥөтүн толору биэрбэт, эбээһинэһин толорбот түгэнигэр, административнай эппиэтинэскэ тардыллыан сөп буолла. Бу уларыйыы Арассыыйа сиригэр-уотугар интэриниэт сибээһинэн туруктаах хааччыйыыны мэктиэлиир сокуоҥҥа олоҕуран киирэр.

Ньиэп атыыта

Арассыыйа ньиэбин тас дойду юридическэй уонна физическэй сирэйдэригэр тиксэрэр сокуонунан бобулунна. Бу тас дойдулар Арассыыйа ньиэбигэр муҥутуур сыананы таһаарбаккыт диэн хааччах туруорбуттарыгар хоруй быһыытынан ылыллыбыт быраабыла. Өскөтүн тас дойдуларга ньиэби атыылаһыыга сыананы хааччахтааһын баар буоллаҕына, оннук атыы-эргиэн сыһыана сокуону кэһиинэн ааҕыллыан сөп буолла.

Куттал суох буолуутун хааччыйар уорганнар

Судаарыстыбаннай куттал суох буолуутун хааччыйар уорганнар (ФСБ, СВР, ФСО, Минобороны, МВД) үлэлэрэ билигин муниципальнай уонна сыдаарыстыбаннай өҥөлөрү оҥорууга киирбэт буолла. Уларыйыы куттал суох буолуутун хааччыйар уорганнар үлэлэрин кистэлэҥҥэ тутар сыаллаах ылыллар.

Булт хонтуруола кытаатар

Булт туһунан сокуоҥҥа уларытыылар киириэхтээхтэр, онно олоҕуран булт судаарыстыбаннай инспектордара буруйу оҥорууну тохтотор уонна сэрэтэр сыаллаах эриэйдэлэри бастайааннай ыыталлара көҥүллэниэҕэ.

Маны таһынан, булт инспектордара буруйдааҕы туталларыгар бэйэ күүһүн уонна сааны-саадаҕы туһанар бырааптаныахтара.

Сокуоҥҥа киирэр саҥа уларыйыылар браконьердааһыны утары охсуһууну күүһүрдэр сыаллаахтар диэн Госдуума саайтыгар этиллэр.

Дьиэнэн хааччыйыы

Регион таһымыгар былаастар дьиэҕэ уочаракка турар дьоҥҥо байыаннай сулууспалаахтарга анаммыт дьиэлэртэн биэрэр кыахтаныахтара, биллэн турар, бэриллэр дьиэлэр байыаннайдарга наадата суох буолбут түгэннэригэр эрэ.

Дьиэни-уоту тупсарыыга наадыйар дьон уочаратыгар бойобуой дьайыы кыттыылаахтара, инбэлииттэр уонна кинилэр дьиэ кэргэттэрэ, инбэлиит оҕолоохтор киирсэллэр.

СВО кыттыылаахтарын оҕолорун үөрэххэ ылыы

Олунньу 20 күнүгэр быстах байыаннай эпэрээссийэҕэ кытта сылдьар дьон оҕолорун бакалавриат уонна специалитет бырагыраамаларынан үрдүк үөрэх кыһатыгар ылыыны хааччыйар сокуон  олоххо киирэр болдьоҕо кэлиэхтээх.