Октябрьскай уокурукка отчуоту нэһилиэнньэ биһирээтэ  

Евгений Григорьев Октябрьскай уокурук олохтоохторун иннигэр отчуота киин куорат 31№-дээх оскулолатыгар Ил Түмэн уонна Куорат дууматын дьокутааттара, уопсастыбаннас, бэтэрээннэр, ыччат кыттыылаах буолан ааста. 
Евгений Григорьев ааспыт сылга дойду бэрэсидьиэнэ Дьокуускай куорат маастар-былаанын өйөөбүтүн түмүгэр бырайыагы олоххо киллэрии уопсай үбүлээһинэ 448 млрд солкуобайга тиийбитин ааспыт 2023 сыл сүрүн ситиһиитинэн ааттаата.
«Кэлиҥҥи биэс сылга Дьокуускай куорат нэһилиэнньэтэ 47 тыһыынча киһинэн эбилиннэ, аҥаардас ааспыт сылга 4 тыһыынча кэриҥэ кырачаан күн сирин көрдө. Оттон куорат олохтоохторун  орто сааһа 34 саас буолан, федеральнай киин уонна өрөспүүбүлүкэ өйөбүллэринэн оскуола уонна оҕо саадын тутуута, спорт эбийиэктэрин үлэҕэ киллэрии, суол өрөмүнэ, инженернэй инфраструктураны, тиэргэннэри, уопсастыбаннай туоналары тупсарыы түргэн тэтимнээхтик ыытыллар»,- диэн бэлиэтээтэ Евгений Григорьев.

Дойду баһылыга Владимир Путин көҕүлээһининэн олоххо киллэриллэр биэс национальнай бырайыагынан 2019 сылтан Дьокуускай куорат бүддьүөтүгэр 17,5 млрд солк, ол иһигэр аҥаардас 2023 сылга 5,5 млрд солк. Киирбитин тоһоҕолоото.
Октябрьскай уокурук олохтоохторо куорат оскуолаларыгар ыытыллар хапытаалынай өрөмүөннэри, салҕааһыннары тутууну, хаарбах дьиэттэн көһөрүү хаамыытын, куорат күөллэрин ыраастааһын, дьэллик кыыллары кытта охсуһуу үлэтин биһирииллэрин ыйдылар. 
Ил Түмэн дьокутаата, М.К. Аммосов аатынан ХИФУ ректора Анатолий Николаев куорат маастар-былааныгар университет саҥа эбийиэктэрэ киирбиттэрин, 2030 сылга диэри куорат сайдыытыгар федеральнай киинтэн уопсайа 450 млрд солк. кэриҥэ сөҕүмэр суума киирээри турарын үөрэ бэлиэтээтэ. 
Классическай гимназия дириэктэрэ Клара Андреева куорат баһылыга гимназия хапытаалынай өрөмүөнүн туһунан этиитин сэргии истибит.