Октябрьскай уокурукка Олохтоох дьаһалта үлэтин үрдүктүк сыаналаатылар
2022 сылга уокурукка баар 31-с №-дээх оскуолаҕа, «Белочка», «Кэнчээри», «Умка» оҕо уһуйааннарыгар өрөмүөн ыытылынна. Хаарбах дьиэ 4 кыбартыыратыттан 15 гражданин көһөрүлүннэ. Ленин проспегын хапытаалынай өрөмүөнүн бастакы түһүмэҕин сэргэ Глухой, Жирков уулуссаларын переулоктара, Каландаришвили уулуссата өрөмүөннэннилэр. Тиэргэн территориялара тупсарылынна, спортивнай балаһааккалар тутулуннулар, оҕо балаһааккалара өрөмүөннэннилэр.
2023 сылга Дьиэ кэргэн иитиитин киинигэр чугаһыыр суол уонна Теплай күөлү туоруур муоста тутуулара саҕаланар, уулуссалар өрөмүөннэрэ салҕанар, итиэннэ 12 тиэргэн территорията, Сайсары күөл кытыла өрөмүөннэниэхтэрэ, Доҕордоһуу болуоссатыгар сылаас тохтобул туруоруллуоҕа. Аадырыстаах бырагырааманан 26 киһи көһөрүллүөҕэ.
Отчуоту истэн баран, уокурук социальнай эбийиэктэрин салайааччылара классическай гимназия хапытаалынай өрөмүөнүгэр, 17-с №-дээх оскуолаҕа салҕааһын тутуутугар, Үүнэр көлүөнэ театрын таһынааҕы территория өрөмүөнүгэр болҕомтону уурарга көрдөстүлэр. Олохтоохтортон киирбит элбэх ыйытык ОДьКХ эйгэтигэр, территориялары тупсарыыга, санитарнай ыраастааһыҥҥа, алкогольнай бородууксуйа атыытын аҕыйатарга сыһыаннаахтар.
Киирбит ыйытык барыта боротокуолга киирэн салгыы үлэлэһэргэ барар.
Сонуннар
Ордук ааҕаллар
