ОДьКХ күннээҕи түбүктэрэ: өрөмүөн, ыраастааһын, көҕөрдүү

Тустаах тэрилтэлэр куорат хаһаайыстыбатын боппуруостарыгар баһылыгы солбуйааччы Егор Кардашевскайга үлэ хаамыытын отчуоттаатылар.  

«Жилкомсервис» тэрилтэ Табаҕаҕа канализация уонна септик ситимнэрин өрөмүөннүүрүн туһунан иһитиннэрдэ. Салгыы маннык үлэ Марха микрооройуонугар ыытыллыахтаах.

«Нэдиэлэ устата анал станцияҕа 16 тыһыынча куб.миэтэрэ убаҕас бөх, оттон куорат полигонугар 25, 8 тыһыынча куб.миэтэрэ кытаанах бөх тиэйилиннэ», – диэн кэпсээтэ «Жилкомсервис» муниципальнай унитарнай тэрилтэ салайааччыта Валерия Билоус. Бу тэрилтэ киин куорат уокуруктарын уонна кытыы нэһилиэктэрин, ону таһынан  «Синет» хампаанньаны субуотунньуктар кэннэ полигоҥҥа бөҕү илдьэн тоҕор босхо толуоннарынан хааччыйар.

«Якутскэкосети» ХЭТ күн устата куоракка 41 анал тиэхиньикэ үлэлии тахсарын, биир сууккаҕа полигоҥҥа 1800 куб.миэтэрэ кытаанах бөх тиэйиллэрин отчуоттаата.

«Ааспыт нэдиэлэҕэ биһиэхэ 96 сайаапка киирбитэ, онтон 44-дэ толорулунна. Кыаллыбатах сайаапка үксэ – санитарнай ыраастааһын уонна көрүүтэ-истиитэ суох кыыллары тутуу боппуруостара», – диэн Дьокуускай куорат Биир кэлим дьуһуурунай диспетчерскэй сулууспатын бэрэстэбиитэлэ кэпсээтэ.  

«Якутдорстрой» АУо Үс Хатыҥ сиригэр санитарнай ыраастааһыны ыытар.

Куорат хаһаайыстыбатын үлэлэтэр сулууспа салайааччыта Айаал Егинов билигин канализация люктарын инвентаризацията буола турарын иһитиннэрдэ. Олохтоох бэйэни салайыныы уорганнарыгар үлэни түмүктүүллэригэр соруйда.

Киин куорат уокуруктарын уонна нэһилиэктэрин управлениеларын бэрэстэбиитэллэрэ ыраастааһын, көҕөрдүү үлэтэ ыытылларын, субуотунньуктар тэриллэллэрин кэпсээтилэр.   

Егор Кардашевскай үлэни күүһүрдэргэ дьаһайда.