08.03.2023 | 10:00

Оҕолорбут сөхтөрдүлэр!

Оҕолорбут сөхтөрдүлэр!
Ааптар: Баһылай ПОСЕЛЬСКАЙ
Бөлөххө киир

Саас кэлиитин түстүүр кулун тутар 1 күнүгэр Кемеровотааҕы “Снежнай” хайыһар комплексыгар хайа да күннээҕэр элбэх көрөөччү тоҕуоруста. Ол өйдөнөр. Хайыһар спордун саамай сэргэх уонна күлүмэх түргэн көрүҥэр – 1 км “сприҥҥэ” күрэхтэһиилэр болҕомтону тартылар. Сахабыт сирин хайыһардьыт оҕолоругар эрэл улахан этэ.

СӨ физическэй култуураҕа уонна спорка миниистирин I солбуйааччы Александр Бугаев, хайыһар Федерациятын бэрэссэдээтэлэ Семен Иванов, спорка солбугу бэлэмниир СӨ Киинин дириэктэрин э.т. Михаил Варламов, Алданнааҕы спорт кыһыҥҥы көрүҥнэригэр Киин дириэктэрэ Максим Скупой уо.д.а. икки үрүҥ көмүс уонна боруонса мэтээллэр кэлбиттэриттэн үөрэллэрин, астыналларын биллэрдилэр.

Күн-дьыл -1 кыраадыс тымныы, өлгөм хаар түһэн үллүктээн, сытыы тыалынан быһыта сынньан, төһө да кыра соҕус мэһэйи үөскэттэр, спортсменнар  бары тэҥ усулуобуйаҕа күрэхтэстилэр. Кыргыттар уонна уолаттар 65-тии буолан, бастаан “квалификацияҕа” утуу-субуу стартаан куоталастылар. 30-туу кыттааччы хаалан, финал ¼ алталыы буолан биэстии “забегка”, финал аҥаарыгар 12-лии кыттааччы сиитэлэнэн, финалга алталыы бастыҥ быһаарыстылар.

Кыргыттарга Инна Рыбкина түһүмэх аайы сэниэтин быспакка кэлитэлээтэ, финалга иккис үчүгэй көрдөрүүлэннэ. Тобугун эмтээн үтүөрдүбүт бырааһа Ольга Поздняковаҕа, күрэхтэһиилэргэ бэлэмнээбит, хайыһарын үчүгэйдик маастаабыт тренерэ Алексей Егоровка махтанна.

Полуфиналга Саха сирин хамаандатыттан Вадим Ширяев, Вадим Кривоногов, Павел Сергеев тахсыбыттарыттан, финалга Вадим Ширяев уонна Вадим Кривоногов стартарын олус бэркэ ыллылар. 100 м уһуҥҥа инники күөҥҥэ уһулу ойон таҕыстылар. Сыыры таҥнары түһэн, уһун көнөҕө тэтимнэрин ыһыктыбакка, туруору эниэни эрчимнээхтик өрө дабайан, 100 м бүтэһик көнөҕө кэлиилэригэр биһи уолаттарбыт көстө түспүттэригэр, биэтэккэ ыһыы-хаһыы сүрдэннэ. Вадим Ширяев – иккиһинэн, Вадим Кривоногов үсүһүнэн түмүктээтилэр. ”Уруй! Айхал!” ньиргийэн олордо!

Уолаттарга Сибиир, кыргыттарга Москва, Кузбасс оҕолоро үчүгэй көрдөрүүлэннилэр.

Кулун тутар 3 күнүгэр «Снежнай” хайыһар комплексыгар буккаас эстафетаҕа кыргыттар 2х3 км, уолаттар 2х5 км, барыта 11 хамаанда стартаата.

Оонньуулар үрүҥ көмүс призера Инна Рыбкина бастакы түһүмэххэ барда уонна Нина Садовскаяҕа бастакынан аҕалан биэрдэ. Иккис түһүмэххэ сүүрбүт Нина Садовская утарсааччыларыттан лаппа хаалан, алтыһынан кэллэ. Үһүс түһүмэххэ Оонньуулар үрүҥ көмүс призердара Вадим Ширяев балаһыанньаны кыайан көннөрбөтө. 10 км төрдүс буолбут Павел Сергеев төрдүс түһүмэххэ биир утарсааччытын ситэн, бэсиһинэн түмүктээтэ. Уһук Илин хамаандата бастаата, Кузбаас – иккис, Сибиир үһүс бириистээх миэстэлэннилэр. Москвалар кэннилэриттэн тилэх баттаһа биһи оҕолорбут бэһис буоллулар.

Хамаанда тренерэ Виктор Васильев санаатын үллэстэригэр үс иһигэр киирбиттэр Арассыыйа сүүмэрдэммит хамаандатыгар дьарыктаналларын бэлиэтээтэ. Нина Садовская “выключатель” диэн ааттанар бүтэһик дабайыыга эстэн, ситтэрдэ. Тилэх уопсан иһэр утарсааччылара арыый да сэниэлээх буолан биэрдилэр. Баҕар, дьарыгар туох эрэ сыыстарыы баар буолуон сөп. Дьиҥинэн, бэлэмнэнии-эрчиллии олус үчүгэй этэ. Үбүлээһин да көрүллүбүтэ. Экипировканан, инбэнтээринэн, хайыһар мааһынан толору хааччыллыы баара. Хайыһары маастыыр анал идэлээх исписэлиистэр эҥкилэ суох үлэлээтилэр. Бу саҕалааһын эрэ. Инникитин элбэх үлэ күүтэр.

Сарсыныгар “Доҕордоһуу эстафетатыгар” Николай Копырин “Снежинка” хамаандаҕа Урал, Татарстан, Башкортостан уолаттарын кытта иккис түһүмэххэ кыһыл көмүс мэтээли ылары ситистэ. Николай Охлопков “Звездаҕа” Сибиир, Кузбасс уолаттарыныын – бүтэһик,  Полина Николаева “История” хамаандатыгар Москва, Кузбасс, Башкортостан кыргыттарыныын төрдүс түһүмэххэ сүүрэннэр, үрүҥ көмүс, Анна Глотова “Спорт” хамаандаҕа Кузбасс, Белоруссия, Казахстан кыргыттарын кытта – үһүс, Павел Сергеев “Елочка” хамаандатыгар Кузбасс, Татарстан уолаттарыныын бастакы түһүмэххэ сүүрэннэр, боруонса мэтээллэри ылаттааннар, биир дойдулаахтарын, тренердэрин, төрөппүттэрин үөртүлэр.

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Хомунаалынай төлөбүр төһө үрдүүрүй?
Сонуннар | 11.07.2024 | 12:00
Хомунаалынай төлөбүр төһө үрдүүрүй?
Ый саҕаланыытыгар үгэспитинэн саҥа сокуоннары билиһиннэрэбит. От ыйыттан туох уларыйыыта киирдэ?
НВК Саха бырагыраамата от ыйын 8-14 күннэригэр
Сонуннар | 07.07.2024 | 10:00
НВК Саха бырагыраамата от ыйын 8-14 күннэригэр
Понедельник, 8 июля 6:00 Тиэргэн 6+ 6:30 Мы вам покажем 12+ 7:00 Сана кун 6+ 8:00 Утро Якутии 6+ 9:00 Сана кун 6+ 10:00 Утро Якутии 6+ 11:00 Тиэргэн 6+ 11:30 Айтал уонна аптаах куус 0+ 11:45 О5о саас ыллыыр 6+ 12:00 "Якутия" информационная программа 12+ 12:15 Сайдыс 6+ 12:45...