Оҕолор сэбиэттэрин саҥа бырайыактара куораты тупсарыыга сыһыаннаах

Куорат баһылыгын иһинэн Оҕолор уопсастыбаннай сэбиэттэрэ 2022 сыллаахха тэриллибитэ.
Олунньу 19 күнүгэр Сэбиэт баһылык Евгений Григорьев, Үөрэх управлениетын начаалынньыга Мария Петрова кыттыылаах мунньаҕа ааспыт 2023 сылга ыытыллыбыт үлэ отчуотун быһыытынан ааста. 
Ол курдук, Дьокуускай куораттааҕы Оҕолор уопсастыбаннай сэбиэттэрин бэрэссэдээтэлэ Дарья Соколова иһитиннэрбитинэн, оскуолаларга үлэлиир медиа-кииннэргэ аналлаах форуму, уопсастыбаннай туоналар хаардарын ыраастыыр, приюкка сытар кыылларга көмөлөһөр аахсыйалары, «ВозМОЖНОсти» талааннаах ыччат бэстибээлин о.д.а. тэрээһиннэри ыыппыттар. Оттон ааспыт сыл саамай улахан ситиһиитинэн «Движение первых» федеральнай күрэх гранын хаһаайына буолбуттарын ааттыыллар.
Онон 2024 сылга куорат 12 оскуолатыгар «Движение первых» 12 хайысхатынан бэстибээл ыытар былааннаахтар. 
Оҕолор уопсастыбаннай сэбиэттэрин көхтөөх чилиэннэрэ маны сэргэ 2024 сылга былаанныыр бырайыактарын билиһиннэрдилэр. Ол курдук, тыйаатыр, медиа эйгэтин сэргиир оҕолорго аналлаах тэрээһиннээхтэрин, мас олордор, волонтерскай хамсааһыны күүһүрдэр баҕалаахтарын иһитиннэрдилэр. 
Евгений Григорьев куорат бастыҥ уопсастыбанньык үөрэнээччилэригэр Владимир Путин өйөбүлүн ылбыт маастар-былаанынан 2030 сылга диэри Дьокуускай куорат ирбэт тоҥ үрдүгэр олорорго, үөрэнэргэ, үлэлииргэ бастыҥ куорат буолуохтаах диэн бэлиэтээтэ итиэннэ 14 саастарын туолбуттары «Куоракка табыгастаах эйгэни тэрийии» федеральнай бырайыак онлайн-куоластааһыныгар кыттарга ыҥырда, диэн иһитиннэрэр Дьокуускай куорат Олохтоох дьаһалтатын пресс-сулууспата.