03.02.2023 | 14:00

Оҕолор саахыматы баһылыыллар

Оҕолор саахыматы баһылыыллар
Ааптар: Баһылай ПОСЕЛЬСКАЙ
Бөлөххө киир

Арассыыйаҕа саахымат оонньуута өрө тутуллар. Оҕолорго “Үрүҥ ладья” Бүтүн Арассыыйатааҕы күрэхтэһии сыллата ыытыллар. Сахабыт сиригэр эмиэ үтүө үгэскэ кубулутуллан, күрэхтэһиилэр сыллата буолаллар. 14-гэр диэри саастаах Дьокуускай куорат оҕолорун түөртүү оонньооччулаах хамаандалара “Үрүҥ ладья” I-кы түһүмэҕэр күрэхтэстилэр. Сүрүн судьуйанан Бүтүн Арассыыйатааҕы категориялаах судьуйа Гаврил Винокуров үлэлээтэ. Физико-техническэй лицей хамаандата бастаата, 2 №-дээх  политехническай оскуола – иккис, куорат классическай гимназията үһүс бириистээх миэстэлэргэ тигистилэр.

Физико-техническэй лицейтэн Давид Местников уонна 2 №-дээх оскуолаттан Сайаана Аргунова биир да хотторуута суох оонньоотулар. 2 №-дээх оскуола саахыматчыт оҕолоро Артур Васильев уонна Алена Румянцева биирдии эрэ хотторуулаах үчүгэй оонньуулары көрдөрдүлэр.

 

“Үрүҥ ладья” II-с түһүмэҕэр улуустар уонна Дьокуускай куорат кыайыылаах хамаандалара утарыта көрсүөхтэрэ. Бастыҥнар Сочига Бүтүн Арассыыйатааҕы “Үрүҥ ладья” күрэхтэһиитигэр кыттыахтара, Сахаларын сирин чиэһин көмүскүөхтэрэ. Онон, күрэхтэһии эппиэтинэһэ улахан.

 

Арассыыйа Кубога – Аҕа баһылык бирииһигэр

Өрөспүүбүлүкэ Национальнай художественнай музейын сиэдэрэй, киэҥ-куоҥ саалатыгар саахымакка Арассыыйа Кубогын I-кы түһүмэҕэ Саха Өрөспүүбүлүкэтин Аҕа баһылыгын бирииһигэр ыытыллан, болҕомто киинигэр турда.

Сахабыт сиригэр саахымат историятыгар аан бастаан ыытыллар улахан күрэхтэһиигэ дойду аҕыс регионуттан биэс международнай гроссмейстер: суруналыыс Дмитрий Кряквин, оҕолорго Арассыыйа сүүмэрдэммит хамаандатын сүрүн тренерэ Михаил Кобалия, дойду саамай эдэр гроссмейстера 16 саастаах Володар Мурзин, Бурятияттан Антон Шомоев уонна Москваттан Арассыыйа Кубогын былырыыҥҥы кыайыылааҕа Борис Грачев кыттан, күрэхтэһиини киэргэттилэр. Сахабыт сириттэн өрөспүүбүлүкэ чемпионнара, күүстээх спорт маастардара Дмитрий Егоров, Нариман Мустафин, Павел Бекетов, Владимир Таппыров, саахымакка дьоҕурдаах оҕолортон Арсений Чумаевскай, Айсен, Айтал Местниковтар, “Үрүҥ ладья” кыайыылаахтара, 2024 с. Дьокуускайга буолар “Азия оҕолоругар” кыттыахтаах спортсменнар бааллар.

Москваттан сылдьар сүрүн судьуйа Михаил Крюков этэринэн, быйыл Арассыыйа 15-17 саахымакка Кубога ыытыллаары турар, олортон 16 бастыҥ бу сыл ахсынньы ыйыгар Ханты-Мансийскайга Арассыыйа Кубогын хаһаайына буолары быһаарсыахтара. Маннык улахан таһымнаах күрэхтэһии Дьокуускайга ыытыллыбыта саахымат сайдыытыгар улахан ситиһии. Биллэн турар, Саха сирин саахыматчыттара туһалаах оскуоланы ааһыахтара, элбэҕи сүһүөхтэрэ, үөрэниэхтэрэ. Гроссмейстердар күрэхтэһэллэрин таһынан, маастар-кылаастары, сеанстары ыыттылар. 31-с оскуола бэһис кылааһын үөрэнээччитэ Саша Иванов гроссмейстердары кыайталаан, сөҕүүнү-махтайыыны үөскэттэ. Михаил Крюков саахыматчаттарга художественнай музей сиэдэрэй саалатыгар оонньуур кыаҕы биэрбит Владимир Егоров бэрэсидьиэннээх Саха Өрөспүүбүлүкэтин саахыматка федерациятыгар махталын биллэрдэ. Бүтэһик туурга диэри ким кыайыылаах тахсара биллибэт сытыы киирсиилэр буоллулар.

Интэриэһинэй, соһуччу түмүктэрдээх оонньуулар буолуталыыллар. Бэһис кылаас үөрэнээччитэ Саша Иванов гроссмейстердартан очко ылаттаан, саахыматы таптааччылары сөхтөрдө. Аҕыс туур кэнниттэн гроссмейстер Михаил Кобалия 6 очколаах күрэхтэһиини баһылаан-көһүлээн иһэр. Володар Мурзин, Арсений Чумаевскай, Борис Грачев 5.5 очколаахтар, Антон Шомоев, Евдокия Избекова 5-тии очколаахтар. Сахабыт сирин маастардара Нариман Мустафин, Василий Романов, Дмитрий Егоров, Александр Иванов, Павел Бекетов, Юрий Родионов 4.5 очколаахтар.

Олунньу 1 күнүгэр Саха Өрөспүүбүлүкэтин Аҕа Баһылыгын бирииһигэр саахыматка буола турар Арассыыйа кубогын I түһүмэҕин кыайыылааҕа биллиэҕэ.

Сонуннар

Ордук ааҕаллар

Полина Победа:  «Дьоллоох буолуҥ олоххутугар, түүлгүтүгэр»
Дьон | 29.02.2024 | 10:00
Полина Победа: «Дьоллоох буолуҥ олоххутугар, түүлгүтүгэр»
Бүгүҥҥү ыалдьыппын улаханнык билиһиннэрэр да наадата суох буолуо. Кинини, өрөспүүбүлүкэ сахалыы тыллаах олохтоохторо ПОЛИНА ПОБЕДА диэн ааттаах хоһоонньуту, социальнай ситим устун билбиттэрэ ыраатта. Полина Пантелеймоновна Находкина хомоҕой тыллаах хоһоонноро элбэх киһи кутун туталлар, махталын ылаллар. Кини ону таһынан имигэс үҥкүүһүт, шпагат түһэр, араас эрчиллиилэри холкутук оҥорор, төбөтүн оройугар турар –...
Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.
Сүүтүк саҕа сүбэлэр
Тускар туһан | 17.02.2024 | 10:00
Сүүтүк саҕа сүбэлэр
Бүгүҥҥү нүөмэрбэр хаалбыт 25 сүбэни бэчээттиибин. Ааҕан туһаныаххыт диэн эрэнэбин, олоххут куруук күөх хонуунан аастын, күҥҥүт чэмэлийэ тыктын, дьоллоох-соргулаах буолуҥ!