Оҕо аймах сылын икки бастакы ыйыгар 1697 кырачаан күн сирин көрдө

2024 сылга Саха Өрөспүүбүлүкэтигэр биллэриллибит Оҕо аймах сылын икки бастакы ыйыгар 1697 кырачаан, ол иһигэр 865 кыыс, 832 уол оҕо күн сирин көрдүлэр, диэн иһитиннэрэр Доруобуйа харыстабылын министиэристибэтэ.
Кэлиҥҥи биэс сылга Саха Өрөспүүбүлүкэтигэр ийэ буолууну уонна оҕо төрөөһүнүн үбүлээһин иэнэ 8-тан тахса төгүл улаатта. Федеральнай бырагыраамалары сэргэ региональнай өйөбүллэр бааллар. Ил Дархан Айсен Николаев көҕүлээһининэн үһүс оҕоҕо төрөөтөҕүнэ ананар «Дьиэ кэргэн» ийэ хапытаала быйылгыттан икки бүк үрдээн, 300 тыһ. солк. тиийдэ. Ил Дархан маны сэргэ Саха АССР төрүттэммитэ 100 сылынан олохтоммут «Үйэ оҕолоро» тус сыаллаах хапытаалы кэлэр биэс сылга диэри уһатар туһунан ыйааҕы таһаарбыта. Ол курдук, бу хапытаал 2022 сыл тохсунньу 1 күнүттэн 2027 сыл ахсынньы 31 күнүгэр төрөөбүт оҕолорго дьиэ кэргэн дохуотуттан тутулуга суох ананар. 2024 сылга «Үйэ оҕолоро» тус сыаллаах хапытаал харчыта 110 тыһ. солк. тэҥнэһэр. Оттон дьиэ кэргэн хапытаалын өрөспүүбүлүкэ ыаллара сүрүннээн олох-дьаһах усулуобуйатын тупсарыыга, тырааныспар атыылаһыыга туһаҕа таһаараллар, диэн иһитиннэрэр Ил Дархан уонна Бырабыыталыстыба пресс-сулуспата.