08.12.2022 | 17:00

Ньурбаҕа спорт күннэрэ

Ньурбаҕа спорт күннэрэ
Ааптар: Баһылай ПОСЕЛЬСКАЙ
Бөлөххө киир

Ньурба улууһугар 2027 сыллаахха Саха сирин норуоттарын IX-с Спортивнай оонньууларын ыытыы чэрчитинэн ахсынньы 1-2 күннэригэр СӨ Бырабыыталыстыбатын бэрэссэдээтэлин солбуйааччы, Спортивнай оонньуулары тэрийэр кэмитиэт бэрэссэдээтэлэ Сергей Местников тиийэн үлэлээтэ, итиэннэ миниистир Леонид Спиридонов салайааччылаах СӨ  физическэй култуураҕа уонна спорка министиэристибэтин күннэрэ ыытылыннылар.

Өрөспүүбүлүкэ дэлэгээссийэтэ

Буолуталаабыт дьаһалларга СӨ Аҕа Баһылыгын сүбэһитэ, боксаҕа Олимпийскай оонньуу боруонса призера Георгий Балакшин, Ил Түмэн дьокутаата Владимир Прокопьев, СӨ үөрэхтээһиҥҥэ уонна наукаҕа миниистирин 1-кы солбуйааччы Алевтина Аргунова, СӨ физическэй култуураҕа уонна маассабай спорка управлениетын начаалынньыга Роман Оконешников, Ньурба оройуонун баһылыга Алексей Иннокентьев салайааччылаах оройуон дьаһалтатын баһылыгын солбуйааччылара, оройуон физическэй култуураҕа уонна спорка управлениетын начаалынньыга, эппиэттээх үлэһиттэр кыттыыны ыллылар.

Үлэлиир бөлөхтөр Спортивнай оонньууларга бэлэмнэнии хаамыытын, Сүлэ, Күндээдэ, Чаппанда бөһүөлэктэригэр тутуулар хаамыыларын көрдүлэр-иһиттилэр, Чаппандаҕа икки этээстээх таас оскуола үөрүүлээх быһыыга-майгыга аһыллыытын түгэнигэр, мобилизацияҕа сылдьар буойуннар дьиэ кэргэттэригэр аналлаах Аһымал аахсыйаҕа кытыннылар.

Көҥүл тустууга СӨ сүүмэрдэммит хамаандатын тириэньэрэ, аан дойду чөмпүйүөнэ Герман Контоев, өрөспүүбүлүкэ чэпчэки атлетикаҕа сүрүн тириэньэрэ, марафоҥҥа аан дойду Кубогын кыайыылааҕа Василий Спиридонов, өрөспүүбүлүкэ боксаҕа оскуолатын дириэктэрэ Максим Куприянов, “Кыайыы 50 сыла” Спорт дыбарыаһын волейболга тириэньэрэ Аркадий Ефремов маастар-кылаастары көрдөрдүлэр, семинардары оҥордулар. Мини-футболга табаарыстыы көрсүһүүгэ олохтоохтор Спорт министиэристибэтин хамаандатын 2:1 баһыйдылар. Нэһилиэнньэни, уопсастыбаннаһы кытта дьыалабыай кэпсэтиилэр буоллулар.

Миэстэҕэ сылдьыы түмүгүнэн Спортивнай оонньууларга бэлэмнэнии уонна ыытыы Тэрийэр кэмитиэтин сүбэ мунньаҕар иһитиннэриилэр, соруктар, ыйыылар-кэрдиилэр оҥоһулуннулар.

Үлэ көхтөөхтүк ыытыллыаҕа

Спорка уонна култуураҕа баай үтүө үгэстэрдээх Ньурба улууһа өр кэтэспит баҕа санаата олоххо киирэн эрэриттэн үөрэр. Социальнай-экономическай хайысхаларга сэргэхсийии тахсан эрэрэ харахха быраҕыллар. Саҥа тутуулар хото ыытыллаллар. Сиэдэрэй оҥоһуулаах оскуолалар, оҕо уһуйааннара, спорт комплекстара тутуллаллар. Федеральнай айан суолугар олорор бөһүөлэктэр уулуссаларын аспааллааһын барар. Оройуон бастыҥ дьонун үйэтитиигэ, духуобунаска, музейдарга болҕомто күүһүрбүт. Номоххо киирбит Ньурбатааҕы норуот тыйаатыра саҥа дьиэлэнэн-уоттанан, куораты киэргэтэр.

Сорук-былаан элбэх.

Олор тустарынан IX-с Спортивнай оонньуулары бэлэмниир-ыытар СӨ Тэрийэр кэмитиэтин, СӨ физическэй култуураҕа уонна спорка министиэристибэтин, Ньурба оройуонун дьаһалтатын холбоһуктаах сүбэ мунньаҕар элбэх кэпсэтии буолла.

СӨ Аҕа Баһылыга Айсен Николаев 2021 сыл ахсынньы 29 күнүнээҕи 2027 сыл от ыйын 7-11 күннэригэр Ньурбаҕа Саха сирин норуоттарын IX-с Спортивнай оонньууларын ыытар туһунан Дьаһалыгар Оонньуулар балаһыанньалара уонна өрөспүүбүлүкэ тэрийэр кэмитиэтэ бигэргэммиттэрэ. Оонньуулар бырагыраамаларын бырайыагар аэробика, баскетбол, волейбол, мини-футбол, чэпчэки атлетика, ол иһигэр паралимпийскай уонна сурдлимпийскай көрүҥнэр, остуол тенниһэ, көҥүл тустуу, дуобат, саахымат, оҕунан ытыы, буулдьанан ытыы, спортинг, бокс, ГТО многоборьета, ат сүүрдүүтэ курдук көрүҥнэр бааллар. Өрөспүүбүлүкэ бары улуустарыттан уонна оройуоннарыттан 5000 кэриҥэ кыттааччы кэлиэҕэ.

Ньурба куоратыгар тутуллар 3000 миэстэлээх, аныгылыы бүрүөһүннээх сүүрэр  суоллаах стадиоҥҥа уонна физкультурнай-чэбдигирдэр комплекска (көҥүл тустуу, аэробика, чэпчэки атлетика, ГТО многоборьета, мини-футбол, баскетбол; “Олимп” уонна Чаппанда спортивнай комплекстарыгар  (волейбол); Убайаан ытыыга аналлаах балаһааккатыгар (спортинг); Антоновка ытыыга комплексыгар (буулдьанан ытыы); А.И. Иванов аатынан спортивнай саалаҕа (бокс); ипподромҥа (ат сүүрдүүтэ); Сүлэ спорт саалатыгар (дуобат, саахымат); Күндээдэ спорт саалатыгар (остуол тенниһэ); Чаппандаҕа (оҕунан ытыы) күрэхтэһиилэр буолуохтара.

Спортивнай оонньуулары ыытыы чэрчитинэн икки сүрүн спорт объега: сылаас манежтаах кыһыҥҥы стадион уонна харбааһыҥҥа аналлаах бассейннаах физкультурнай-чэбдигирдэр комплекс Ньурба куоратыгар тутуллуохтара.

Тэрийэр кэмитиэт бэлиэтээһиннэрэ

Тэрийэр кэмитиэт бэрэссэдээтэлэ Сергей Местников иһитиннэрбитинэн, бу сыл хаалбыт кэмигэр Оонньууларга бэлэмнэниигэ бары бэлиэтэммит дьаһаллар тустаах министиэристибэлэрин кытта сөпсөһүллэннэр, Өрөспүүбүлүкэ Аҕа баһылыгынан бигэргэниэхтэрэ. Болҕомто федеральнай үбүлээһини ситиһиигэ ууруллуоҕа. Оонньуулар Балаһыанньаларыгар, сүүмэрдэммит хамаандалары бэлэмнээһиҥҥэ, Ньурба оройуонун нэһилиэнньэтин кытыннарыыга киэҥ өрүттээх үлэ күүтүллэр. Саҥа сүүрээннэри, хайысхалары киллэриигэ Спорт уонна Инновация министиэристибэлэрэ ылсыахтаахтар. Холобур, Уһук Илин хамаандаларын кытыннаран, онно эбии, кыайыыны ситиһэн, күрэхтэһиилэр күүрээннэрин үрдэтиэххэ эмиэ сөп.

Ньурба оройуонун баһылыга Алексей Иннокентьев этэринэн, Тэрийэр кэмитиэт уонна Спорт министиэристибэтин дэлэгээссийэлэрин холбоһуктаах сырыылара  көдьүүстээх буолла. Бу ааспыт күһүн Өрөспүүбүлүкэ Аҕа Баһылыга Айсен Николаев кэлэ сылдьыаҕыттан Оонньууларга бэлэмнэниигэ Тэрийэр кэмитиэт уочараттаах үһүс түмсүүтэ буолла.  Оройуон хас биирдии олохтооҕо улахан тутуулар бара туралларынан сүргэтэ көтөҕүлүннэ. Дьон-сэргэ санаата түмүллэн, биир тыынынан олорор. Аҥаардас стадион да тутуутун кэтэспиттэрэ ыраатта. Үбүлээһини булуу, үлэни сааһылааһын бэрээдэктэнэр. Онуоха оройуон тус кылаатын киллэрсэр. 

Ньурба төрүт былыргыттан кус быһый, ат күүстээх дьоннордоох спорт куттаах оройуон. Номоххо киирбит атах оонньуутугар бэйэтин кэмигэр тэҥнээҕэ суох Николай Санников, хотторору билбэтэх бөҕөс Юрий Андреев, боксаҕа Олимпийскай оонньуу медалиһа Георгий Балакшин, аан дойду, Европа кыайыылаахтара Александр Иванов, Владислав Андреев бүтүн Сахабыт сирин киэн туттуулара. Онон, спорка аналлаах улахан тутуулар хайаан даҕаны баар буолуохтаахтар. Өрөспүүбүлүкэ өйөбүлэ, көмөтө баара үөрдэр, астыннарар. Инньэ гынан, физическэй иитиигэ уонна спорка, чөл олоҕу тутуһууга, ыччаты дойдуга бэриниилээх буолуу тыыныгар иитиигэ сүрүн болҕомто ууруллар.  Нэһилиэнньэ тупсаҕай, бары өттүнэн толору хааччыллыылаах олоххо, таһаарыылаах үлэҕэ-хамнаска тардыһар. Оройуон салалтата бары кыаллары-кыаллыбаты тэрийэргэ, оҥорорго кыһаллар.

СӨ физическэй култуураҕа уонна спорка миниистирэ Леонид Спиридонов Оонньууларга бэлэмнэнии Тэрийэр кэмитиэтин кытта үлэ көхтөөхтүк бара турарын, үлэ сүрүн хайысхалара тобуллубуттарын, олохтоохтор, салалта бэйэлэрин үчүгэй өттүнэн көрдөрбүттэрин, бииргэ үлэлиэххэ сөбүн, маассабай спорка элбэх бырайыактар баалларын, Оонньууларга бэлэмнэниигэ былааннарын кэпсээтэ. Спортивнай тутуулар олоххо киллэрилиннэхтэринэ, Ньурбаҕа Арассыыйа, норуоттар икки ардыларынааҕы таһымнаах улахан күрэхтэһиилэри, турнирдары ыытар кыахтар үөскүүллэрин иһитиннэрдэ.

Түмсүүлээх үлэ барыаҕа

Ньурбаҕа сырыы түмүгүнэн оройуоҥҥа физическэй култуураны уонна спорду сайыннарыыга Леонид Спиридонов уонна Алексей Иннокентьев биэс сыл болдьохтоох бииргэ үлэлээһин Сөбүлэһиитин түһэристилэр.

Ньурба улууһа кэскиллээхтик сайдарыгар бигэ олук уурулунна.

 

Онон, Саха сирин норуоттарын IX-с Спортивнай оонньууларын ыытарга, өрөспүүбүлүкэ Экономикаҕа, Тутууга, Үөрэххэ уонна наукаҕа, Култуураҕа уонна духуобунай сайдыыга, Транспорга уонна суол хаһаайыстыбатыгар, Физическэй култуураҕа уонна спорка министиэристибэлэрин, Ньурба оройуонун дьаһалтатын иннилэригэр улахан эппиэтинэстээх соруктар тураллар.

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Мария Мигалкина:   «Кэлии сиэмэлэринэн үлүһүйүмэҥ»
Дьон | 19.07.2024 | 10:00
Мария Мигалкина: «Кэлии сиэмэлэринэн үлүһүйүмэҥ»
Мин бүгүн ааҕааччыларбар, ордук хаһаайкаларга, 35 сыл үлэлээбит уопуттаах агроном, билигин биэнсийэлээх, дойдутугар сайылыы сылдьар Мария Семеновна Мигалкинаны кытта тэлгэһэтигэр тиийэн, үүнээйитин, сибэккитин көрө-көрө, дуоһуйа, астына кэпсэттим.   Сибэккигэ уоҕурдууну хото туттабын Бастатан туран ааҕааччыларга циния диэн сибэкки туһунан кэпсиэҕим. Урут биһиги “Циния обыкновенная” диэни олордор этибит, билигин “Циния кустовая” диэн...
Дьулустаан Ноговицын: ДЬУЛУС! ТУЛУС! КЫАЙ!
Дьон | 11.07.2024 | 10:00
Дьулустаан Ноговицын: ДЬУЛУС! ТУЛУС! КЫАЙ!
«Киин куорат» хаһыат бүгүҥҥү ыалдьыта – Туймаада туонатын Үрүҥ Тунах ыһыаҕын «Дыгын оонньуулара» күөн-күрэһин Таас Боотура, быйылгы күрэх муҥутуур кыайыылааҕа Дьулустаан Ноговицын.   Дьулустаан Ноговицын: – Дьокуускай куорат 1№-дээх баһаарынай чааһын байыаһа, төрөппүттэригэр соҕотох уол, эдьиийигэр быраат, тапталлаах кэргэн, үс оҕо амарах аҕата; – Мас тардыһыытыгар Саха Өрөспүүбүлүкэтин, Арассыыйа уонна аан...
Изабелла Попова: Сүрэхпэр сөҥөрбүт дьүөгэлэрим
Дьон | 19.07.2024 | 12:00
Изабелла Попова: Сүрэхпэр сөҥөрбүт дьүөгэлэрим
Арассыыйа үөрэҕириитин туйгуна, Саха сирин үөрэҕириитин бочуоттаах үлэһитэ, хас да кинигэ ааптара Изабелла Ильинична Попова бүгүн өрөгөйдөөх үбүлүөйүн көрсө өссө биир кинигэтин сүрэхтиир. Дьэ, кырдьык, сүрэхтиир... Сүрэҕин сылааһын иҥэрбит кинигэтин!   Ахтар-саныыр дьүөгэлэрим, Аламаҕай сэгэрдэрим, Саһарҕалаах сарсыардабын Сандаарытар куоларым!   Сүр... Сүрэх, сүрдээх, сүрэхтиир... Сахабыт тыла барахсан тугун бэрдэй! Биир тылтан силистэнэн-мутуктанан...