Норуот маастардарыгар стипендия көрүллүөҕэ

Киин куорат олохтоохторо уонна ыалдьыттара тэрээһиҥҥэ өрөспүүбүлүкэ дэгиттэр талааннаах маастардарын үлэлэрин сөҕө-махтайа, астына көрөллөр. Сылын аайы быыстапка-дьаарбаҥкаҕа тыһыынчаттан тахса маастар кыттар, ол иһигэр Норуот айымньытын дьиэлэрэ, орто уонна үрдүк үөрэх кыһаларын устудьуоннара, өрөспүүбүлүкэ тэрилтэлэрэ. Тэрээһин чэрчитинэн маастар-кылаастары, араас күрэхтэри, интерактивнай балаһааккалары ыыталлар.

Быйылгы быыстапка-дьаарбаҥка «Симэх» галерея 30 сылыгар, Арассыыйаҕа биллэриллибит Учуутал уонна уһуйааччы, итиэннэ Саха сиринээҕи Үлэ сылларыгар ананна.

Норуот маастарын күнүн чэрчитинэн Ил Дархан Айсен Николаев араас улуустартан кэлбит норуот маастардарын кытта көрүстэ. Кини көрсүһүү кэмигэр норуот уус-уран оҥоһуктара аан дойдуга тиийэ биллэр Саха сирин брендинэн буолалларын бэлиэтээтэ. «Симэх» национальнай киин дириэктэрэ  Яна Игнатьева иһитиннэрбитинэн, норуот уус-уран оҥоһугунан дьарыктанар маастар ахсаана биэс тыһыынчаҕа тиийэн эрэр.

Көрсүһүү түмүгүнэн Ил Дархан норуот маастардарыгар стипендия олохтуур туһунан быһаарыыны ылынна. Стипендия араас хайысхалаах оҥоһуктарга көрүллэр: маһынан уһаныы, художественнай керамика, ювелирнай оҥоһуктар, муоһу чочуйуу, сылгы сиэлиттэн өрүү уо.д.а. Итини таһынан норуот уус-уран оҥоһуктарын уон сыллаах судаарыстыбаннай өйөбүлүн концепциятын оҥоруу туһунан быһаарыы ылылынна. Концепцияҕа ураты суолталаах хайысхалар, норуот уус-уран оҥоһуктарын сөргүтүү уонна сайыннарыы, каадыры бэлэмнээһин, бородууксуйаны атыылааһын, сүрүн кыһалҕалар киириэхтэрэ.