Нэһилиэнньэ доруобуйатын харыстааһын – куорат былааһын сүрүн соруга

Баһылык Евгений Григорьев доруобуйа харыстабылын үлэһиттэрин иннигэр отчуота М.Е. Николаев аатынан Медицинэ национальнай киинигэр буолан ааста.

Евгений Григорьев дойду бэрэсидьиэнин, бырабыыталыстыбатын, өрөспүүбүлүкэ салалтатын өйөбүллэринэн кэлиҥҥи биэс сылга элбэх уустук кыһалҕа быһаарыллан, куорат социальнай-экономическай сайдыытын көрдөрүүтэ тупсубутун бэлиэтээтэ.

Ол курдук, үрдүкү бүддьүөттэртэн киирэр, бастатан туран «Үөрэхтээһин», «Куттала суох уонна хаачыстыбалаах суоллар», «Олорор дьиэ уонна куорат эйгэтэ», «Доруобуйа» национальнай бырайыактары олоххо киллэриигэ бэриллэр харчы суотугар куорат бүддьүөтэ 18,5-тан 32,5 млрд солкуобайга тиийэ үрдээбитин бэлиэтээтэ.

Олорор усулуобуйа тупсара нэһилиэнньэ элбииригэр төрүөт буолара саарбаҕа суох. Ол курдук, 2023 сылга куорат олохтооҕун ахсаана 382 тыһ. тахсыбытын, кэлиҥҥи биэс сылга 47 тыһыынча киһинэн эбиллибиппитин, аҥаардас ааспыт сылга 4 тыһыынча кэриҥэ кырачаан төрөөбүтүн бэлиэтээтэ. Оттон куорат олохтооҕун орто сааһа, 2021 сыллааҕы биэрэпис түмүгүнэн, 34 сааска тэҥнэһэн, Арассыыйа биир эдэр куората буолбуппут.

Нэһилиэнньэ доруобуйатын харыстыыр үлэ биир сүрүн көрүҥүнэн арыгыны кытта охсуһуу, бастатан туран атыылааһыны, эргиниини хааччахтааһын буолар. Бу хайысхаҕа 2022 сыллаахха Дьокуускай куорат Олохтоох дьаһалтата арыгыны атыылыыр маҕаһыыннары социальнай эбийиэктэртэн уонна дьон олорор дьиэлэриттэн тэйитэр туһунан уурааҕы ылыммыта, ол кэннэ 2023 сыллаахха Ил Түмэн өрөспүүбүлүкэтээҕи сокуоҥҥа арыгынан эргинэр тэрилтэ 75 кв/м итэҕэһэ суох иэннээх буолуохтааҕын туһунан көннөрүүлэри киллэрбитэ.

Бу миэрэлэр ылылланнар, кэлиҥҥи икки сылга түөрт уонтан тахса арыгы атыылыыр туочука, сымыйа кафе сабыллыбыттар. Ол түмүгэр итирик туруктаах сылдьан буруйу оҥоруу, суол быһылаанын таһаарыы көрдөрүүтэ биллэ аҕыйаабыт.

Медицинэ национальнай киинин генеральнай дириэктэрэ Станислав Жирков федеральнай, өрөспүүбүлүкэ уонна куорат былаастарын түмсүүлээх үлэлэрин түмүгэр олох бары эйгэтигэр үрдүк көрдөрүүлэр ситиһиллэ туралларын, куорат олохтоохторо уулуссалар, тиэргэннэр, уопсастыбаннай туоналар өрөмүөннэнэллэриттэн, тупсарыллалларыттан үөрэллэрин бэлиэтээтэ.