Нам улууһун маастардарын быыстапкатыттан

От ыйын 14-17 күннэригэр Дьокуускай куоракка Нам улууһун маастардарын атыы-быыстапката буолла. Норуот уус-уран оҥоһуктарын галереятыгар тэриллибит быыстапка  бэлитиичэскэй диэйэтэл Илья Винокуров төрөөбүтэ 125 сылыгар  ананна.

Быыстапкаҕа СӨ норуодунай  маастардарын,     норуоттар икки ардыларынааҕы  быыстапкалар лауреаттарын, дипломаннарын,  иистэнньэҥнэр түмсүүлэрин хатыламмат үлэлэрэ турдулар. Кэрэни кэрэхсии  кэлбит дьон  Мария Михайловна  Дьяконова сахалыы мандардаах олбохторун,   Розалия Семеновна Ядрихинская  кылтан оҥоһуллубут саха дьахтарын таҥаһын комплегын,   Тамара Галиновна Васильева уонна Валентин Титович Васильев-Тиит Уола Эрчим Баһыл туос иһиттэрин,    Анна Семеновна Николаева  уруһуйдарын (ол иһигэр,  Нам улууһун олоҥхоһуттарын В.Н.Попов-Бочоох, Е.Г.Охлопков-Буоратай, П.П.Ядрихинскай-Бэдьээлэ субу туран кэлэн олоҥхолуох курдук ойууламмыт хартыыналарын), үс көлүөнэ “Сиэл ситимэ” түмсүүтүн  сөрүөттэн оҥоһуллубут хатыламмат оҥоһуктарын  (салайааччы Н.П.Корнилова) уо.д.а. сэргии көрдүлэр. Быыстапкаҕа кэлбит дьон маастар-кылаастарга сылдьан дуоһуйан тарҕастылар.