«Наливайкалар» дьылҕаларын Уопсастыбаннай палаата уочараттаах мунньаҕа көрдө

Олунньу 8 күнүгэр Матвей Лыткин салайааччылаах Куорат уопсастыбаннай палаатата Олохтоох дьаһалта Урбааҥҥа, потребительскай ырыынакка уонна туризмы сайыннарыыга департаменын салайааччытын э.т. Кирилл Лазаревы кытта элбэх кыбартыыралаах олорор дьиэлэргэ үлэлиир «наливайкалары» бэрээдэктиир кыаҕы биэрэр федеральнай сокуон барылын дьүүллэстилэр.
Мунньахха Олохтоох дьаһалта Быраап департаменын, ИДьМ Дьокуускай куораттааҕы управлениетын, Дьахталлар лигаларын, Аҕалар сүбэлэрин бэрэстэбиитэллэрэ кыттыыны ыллылар. 
Матвей Лыткин бэлиэтээбитинэн, саҥа сокуон регионнарга арыгылаах утаҕы атыылыырга рестораннарга, бардарга, кафеларга, буфеттарга ирдэбил туруорар уонна дьон олорор дьиэтигэр эбэтэр онтон чугас үлэлиир ресторантан ураты уопсастыбыннай аһылык тэрилтэтигэр атыы бириэмэтин хаарчахтыыр кыаҕы үөскэтэр.
«Улахан кыраадыстаах арыгылаах утаҕы оҕо саадын, үөрэх тэрилтэтин, спорт эбийиэгин таһыгар атыылыыр бобуллар. Саҥа сокуон регионнар кыра кыраадыстаах арыгы атыытын бэрээдэктиир боломуочуйаларын кэҥэтэр. 2023 сыл балаҕан ыйын 1 күнүгэр арыгынан эргинэр уопсастыбаннай аһылык тэрилтэлэрин иэнин улаатыннарар туһунан региональнай сокуон киирбитэ. Онон бу федеральнай сокуон дьон олорор дьиэтигэр уонна онтон чугас арыгынан эргинэр уопсастыбаннай аһылык тэрилтэлэрин бэрээдэктиири өссө күүһүрдүөҕэ»,– диир Матвей Лыткин.      
Олохтоох дьаһалта Урбааҥҥа, потребительскай ырыынакка уонна туризмы сайыннарыыга департаменын салайааччытын э.т. Кирилл Лазарев Дьокуускайга арыгынан эргинэр уопсастыбаннай аһылык тэрилтэлэрин мониториннааһыҥҥа ыытыллыбыт үлэни кэпсээтэ. 
«Арыгыны атыылыыр уопсастыбаннай аһылык тэрилтэлэрэ социальнай эбийиэктэртэн Дьокуускай куоракка 75 кв/м тэйиччи туруохтаахтар, атын оройуоннарга – 50 кв/м. 2023 сыл бүтүүтүгэр бу категорияҕа хапсыан сөп 84 эбийиэк баара быһаарыллыбыта,  оччолорго мораторий үлэлиир этэ. Мантан 26 эбийиэк хаарчахха  түбэһэриттэн үлэлээн бүппүтэ, ол иһигэр 19 эбийиэк саалатын кэҥэтэр, 3 эбийиэк хайысхатын уларытар. Маны сэргэ үгүс эбийиэктэр лицензиаттар, балар лицензиялара бүтүөр диэри 171 №-дээх федеральнай сокуонунан биэс сылга диэри лицензияларын уһатар бырааптаахтар»,– диэтэ Кирилл Лазарев.
2024 сыл тохсунньу 1 күнүнээҕи туругунан, Дьокуускай куоракка арыгынан эргинэр 239 уопсастыбаннай аһылык тэрилтэтэ үлэлиир. Биллэрин курдук, Олохтоох дьаһалта 2022 сыл ыам ыйын 6 күнүнээҕи 118п №-дээх уурааҕынан арыгынан эргинэр уопсастыбаннай аһылык тэрилтэлэрин кыраныыссаларыгар уонна социальнай тэрилтэлэртэн төһө ыраах туралларын ааҕыыга уларыйыы киирбитэ. Бүгүҥҥү күҥҥэ Дьокуускай куоракка элбэх кыбартыыралаах олорор дьиэлэргэ уонна онтон чугас 124 эбийиэк арыгынан эргинэр, олортон 55-һэ лицензиялаах.
Дьүүллэһии кэнниттэн уопсастыбанньыктар куорат территориятыгар улахан кыраадыстаах арыгынан эргиниини, лиценциялаах тэрилтэлэр ахсааннарын аҕыйатыыга, дьон олорор дьиэлэригэр «наливайкалары» суох оҥорууга атын куораттар уопуттарын үөрэтэргэ уонна хонтуруоллуур атыылаһыыны оҥорорго көмөлөһөргө бэлэмнэрин эттилэр. 
Киирбит этиилэр сиһилии үөрэтиллэн баран, дьокутааттар көрүүлэригэр атаарыллыахтара.