01.02.2024 | 21:01

Национальнай бырайыактар олох хаачыстыбатын тупсарар аналлаахтар

Национальнай бырайыактар олох хаачыстыбатын тупсарар аналлаахтар
Ааптар: Киин Куорат
Бөлөххө киир

Куорат баһылыга Евгений Григорьев тохсунньу 30 күнүгэр 2023 сыл социальнай-экономическай көрдөрүүлэринэн уонна 2024 сыл былааннарынан «Биир ньыгыл Арассыыйа» политическай партияны өйөөччүлэр иннилэригэр отчуоттаата.

Баһылык ааспыт 2023 сыл биир сүрүн ситиһиитинэн дойду баһылыга Владимир Путин Дьокуускай куорат маастар-былаанын өйөөбүтүн уонна дойду бырабыыталыстыбатынан бигэргэтиллибит кэккэ соруктары туруорбутун ааттаата. Соруктарга кэлэр уонча сылга Дьокуускайга тутуллуохтаах уонунан социальнай эбийиэк, инженернэй уонна тырааныспар инфраструктура киирэллэрин бэлиэтээтэ.

2023 сылга Дьокуускайга Үс сыллаах тупсарыы сыллара түмүктэнэн, кэккэ хайысхаларга былаан туолбутун иһитиннэрдэ. Ол курдук аҥаардаас былырыын 38 тиэргэҥҥэ тупсарыы үлэтэ ыытыллан, үс сыл иһигэр 45 олбуор оннугар 128 өрөмүөннэнэн, былаан үс бүк туолбутун бэлиэтээтэ.

Киин куорат территориятыгар 2019 сылтан биэс национальнай бырайыак олоххо киллэриллэр. Бу сыллар усталарыгар Дьокуускай эбии 17,5 млрд солкуобай кээмэйдээх эбии үбүлээһини ылла.

«Үөрэҕирии» национальнай бырайыагынан Арассыыйаҕа буолан ааспыт Учуутал уонна уһуйааччы сыла Дьокуускай куорат историятыгар хаһан да буолбатах элбэх - 6 үөрэх эбийиэгэ тутуллубут сылынан хаалыаҕа. Маны сэргэ куорат 13 оскуолатыгар хапытаалынай өрөмүөн уонна саҥардыы үлэтэ ыытыллыбыта эмиэ история буолбатах үрдүк көрдөрүү.

«Куттала суох уонна хаачыстыбалаах суоллар» национальнай бырайыагынан 2023 сылга 30 км кэриҥэ усталаах суол ситимэ оҥоһулунна, 71 тыһыынча кв/м иэннээх тротуар уурулунна, Ленин проспегын хапытаалынай өрөмүөнэ түмүктэннэ. 5 сыл устата уопсайа куоракка 164 км усталаах суол ирдэбилгэ эппиэтттиир гына оҥоһулунна.

Суол, уулусса өрөмүөнүн кытта куорат уопсастыбаннай тырааныспарын боппуруоһа быһаччы ситимнээх. Кэлиҥҥи икки сылга муниципальнай ЯПАК уонна «СоюзАвто» чааһынай тиэйээччи оптобустарын паарката биллэ саҥардылынна. Ол курдук, 2023 сылга өрөспүүбүлүкэ бырабыыталыстыбатын өйөбүлүнэн лизининэн 50 саҥа оптоубс кэлбитэ, 10 сылаас тохтобул туруоруллубута. Билигин даҕаны эбии 230 курдук саҥа оптуобуһу атыылаһар сорук турар.

«Олорор дьиэ уонна куорат эйгэтэ» национальнай бырайыагынан киин куоракка 2021-2025 сылларга хаарбах дьиэттэн көһөрөр өрөспүүбүлүкэтээҕи аадырыстаах бырагыраама үлэлиир. Евгений Николаевич Дьокуускай куорат 2019-2025 сс. былааннаммыт бырагырааманы болдьоҕун иннинэ быйыл, 2024 сылга, түмүктүүр сыаллаах-соруктаах үлэлиирин бэлиэтээтэ. «Салгыы 1100 саахалланар туруктаах элбэх кыбартыыралаах дьиэни көһөрөрү умнубаппыт. Дойдубут бэрэсидьиэнэ Владимир Путин 2030 сылга диэри 2023 сыл балаҕан ыйын 1 күнүгэр диэри хаарбаҕынан билиниллибит мас дьиэни барытын көһөрөр соругу туруорбута», - диэтэ Евгений Григорьев.

Социальнай гаастааһыҥҥа, уу ситимнэрин тутууга, дьэллик кыыллары бэрээдэктээһиҥҥэ, куораты көҕөрдүүгэ, уопсастыбаннай туоналары тупсарыыга ыытыллар үлэни эмиэ кэпсээтэ.

Арыгыны утары охсуһууга уопсастыбаннас, дьокутааттар туора турбаттарын, киин куоракка чөл олоҕу тарҕатыыга болҕомто уурулларын бэлиэтээтэ.

Евгений Григорьев итини сэргэ «Биир ньыгыл Арассыыйа» партияны өйөөччүлэри Олохтоох дьаһалта 2024 сыллааҕы үөрэхтээһиҥҥэ, суол тутуутугар, тырааныспар эйгэтигэр, олорор дьиэнэн хааччыйыыга, хомунаалынай хаһаайыстыба үлэтин тупсарыыга, спорка, тыа хаһаайыстыбатыгар сыһыаннаах былааннарын кытта билсиһиннэрдэ.

Отчуот кэнниттэн көрсүһүү кыттыылаахтара 20, 41 №№-дээх оптуобустар Намцыр трагынан эргийэр саҥа схемаларын, Кирзаводка үөрэх кыһаларыгар киирэр суоллары аспааллааһын, урбаанньыттарга УСН ставкатын намтатыы, ыарахан уйуктаах массыыналар сырыыларын хаарчахтааһын, орто уонна дьоҕус урбаан тэрилтэлэрэ «Азия оҕолоро» оонньууларга кыттыыларын туһунан ыйытыыларыгар сиһилии хоруйу ыллылар.

Маны сэргэ «Звезднай» түөлбэ сайдыытыгар, Сайсары уокуругар суол тутуутугар, оптуобустар интервалларыгар, Гагарин уокуругар сылаас толтобуллары туруорууга, куорат оскуолаларын өрөмүөнүгэр сыһыаннаах ыйытыылар киирдилэр.

Сонуннар

Ордук ааҕаллар

Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...
Сүүтүк саҕа сүбэлэр
Тускар туһан | 17.02.2024 | 10:00
Сүүтүк саҕа сүбэлэр
Бүгүҥҥү нүөмэрбэр хаалбыт 25 сүбэни бэчээттиибин. Ааҕан туһаныаххыт диэн эрэнэбин, олоххут куруук күөх хонуунан аастын, күҥҥүт чэмэлийэ тыктын, дьоллоох-соргулаах буолуҥ!