Музыка үрдүкү оскуолатын тутуу саҕаланыаҕа
Тутууга хантараак түһэрсиигэ куонкурус саҕаланна. Дойду баһылыга Владимир Путин сорудаҕынан, Музыка үрдүкү оскуолатын тутуу 2026 сыл бүтүөр диэри түмүктэниэхтээх.
Оскуола саҥа комплексын иэнэ 9,5 тыһ. кв/м буолара сабаҕаланар. Манна 240 оҕоҕо аналлаах үөрэнэр куорпус уонна 150 миэстэлээх интэринээт, кэнсиэртиир саала, библиотека, звукозапись устуудьуйата, фонотека кабинеттара, спордунан дьарыктанар уонна оонньуур балаһааккалар киирсэллэр.
Музыка үрдүкү оскуолатын үөрэххэ уонна наукаҕа проректора Светлана Вдовенко бэлиэтээбитинэн, ааспыт 2023 сылга оскуола 30 сыллаах үбүлүөйүн бэлиэтээбит.
«Бу сыллар усталарыгар оскуолабыт киэн туттуута буолар элбэх оҕо үөрэнэн ааста. Холобура, выпускникпыт Павел Васьковскай билигин Суорун Омоллоон аатынан Опера уонна балет тыйаатырын уус-уран салайааччытынан уонна дирижерунан үлэлиир. Өрөспүүбүлүкэ, Арассыыйа уонна дойду тас өттүгэр айар кэлэктииптэргэ итинник ситиһиилээхтик үлэлиир иитиллээччибит элбэх», – диэн бэлиэтиир проректор.
Музыка үрдүкү оскуолата бүгүн 7-тэн 18-гар диэри саастаах 174 үөрэнээччилээх, маны таһынан 103 устудьуон үрдүк үөрэх бырагырааматыгар үөрэнэр, диэн иһитиннэрэр Ил Дархан уонна Бырабыыталыстыба пресс-сулууспата.
Сонуннар
Ордук ааҕаллар
