Муус устар 12 күнүгэр өрөспүүбүлүкэ үрдүнэн үлэ дьаарбаҥката ыытыллыаҕа
«Работа России. Время возможностей» Бүтүн Арассыыйатааҕы үлэ дьаарбаҥкатын региональнай түһүмэҕэ Саха сирин бары муниципальнай тэриллиилэригэр Арассыыйа бары муннугар курдук муус устар 12 күнүгэр буолуоҕа.
Дьаарбаҥкаҕа дьоҕус урбаан тэрилтэтиттэн саҕалаан, бөдөҥ корпорацияларга тиийэ 350 тахса үлэ тэрилтэтэ уонна урбаанньыт 10 тыһыынчаттан тахса араас үлэ миэстэтин билиһиннэриэхтэрэ.
Үлэҕэ наадыйааччылар эбэтэр идэлэрин уларытыахтарын баҕарар дьон бу күн кэлэн, үлэни биэрээччилэри кытта миэстэтигэр сирэй көрсөн кэпсэтэр кыахтаахтар.
Дьаарбаҥка күн үлэ тэрилтэлэригэр экскурсиялар, үөрэх, үлэ тэрилтэлэрин бэрэстэбиитэллэрэ кыттыылаах төгүрүк остуоллар, семинардар, маастар-кылаастар о.д.а. ыытыллыахтара.
Хас биирдии балаһааккаҕа Дьарыктаах буолуу кииннэрин карьера уонна каадыр консультаннара, итиэннэ үлэни биэрээччилэр бэрэстэбиитэллэрэ баҕалаахтарга сөптөөх үлэни буларга көмөлөһүөхтэрэ, идэни уларытар үөрэхтэргэ направление биэриэхтэрэ, саҥаттан үөрэнэргэ эбэтэр көһөргө өйөбүл көрүҥнэрин билиһиннэриэхтэрэ.
Дьокуускай куоракка дьаарбаҥка муус устар 12 күнүгэр Үлэ кыбаарталыгар сарсыарда 09.00 ч. саҕаланар: Труд уул., 1а, диэн иһитиннэрэр СӨ Дьарыктаах буолуу судаарыстыбаннай кэмитиэтин пресс-сулууспата.
Сонуннар
Ордук ааҕаллар
