МОҤКУРУУККА БАРЫЫ СУДУРГУ БУОЛБУТА ЭРЭЭРИ...
Бу сыл балаҕан ыйыгар моҥкуруукка барыыга уларыйыылар киирбиттэрэ. Ол курдук, 50 тыһ. солк. саҕалаан, 500 тыһ. солк. тиийэ иэстээх киһи, өскөтүн суут приставтар иэһин суотугар кини аатыгар суруллубут туох да баайы-дуолу булбатахтарына, босхо уонна суута суох моҥкурууттаабыттарын туһунан биллэрэр кыахтаммыттара.
Судургутук моҥкуруукка барыы кимиэхэ барсарый?
- Иэһэ 50 000 солк.саҕалаан 500 000 солк. тиийэр буоллаҕына.
- Бас билэр үбэ суох буоллаҕына (соҕотох олорор дьиэни аахпаттар).
- Киһи иэһин сатаан толуйар үбэ суоҕуттан дьыала тохтотуллубут буоллаҕына.
Ханна тиийэбит?
Бу үөһэ ыйыллыбыт ирдэбиллэргэ толору эппиэттиир буоллаххытына, сайабылыанньаҕытыгар кирэдьиит ылбыт бааннаргытын ыйан туран, МФЦ-га туттараҕыт.
Салгыы МФЦ сайабылыанньаҕытын бэрэбиэркэлиир, барыта сөп буоллаҕына – моҥкурууттааһын туһунан биир кэлим реестргэ киллэрэр.
Моҥкурууттааһын 6 ый устата ыытыллар. Бырыһыан, пени, ыстараап ааҕыллан бүтэр. Ол кэм иһигэр кирэдьиити биэрээччи бааннартан үҥсүү киирбэтэҕинэ, иэскититтэн босхолоноҕут.
Туох да бас билэр баайа суох буолаҥҥыт, иэскитин төлүүр кыаххыт суоҕун дакаастыыр уустук соҕус. Приставтар хара баһаам үлэлэрин быыһыгар наадалаах болдьохтору уһаталлара-кэҥэтэллэрэ үгүс буоларын олох көрдөрөр.
Ханнык да дохуота суох буолуохтааххыт, онтон атын дьыаланы тохтотоллор.
Судургу моҥкурууттааһыҥҥа суут, финансовай салайааччы диэн суох, ол иһин баайгытын-дуолгутун кирэдьиит биэрбит тэрилтэлэр бэйэлэрэ көрдүүллэр.
Кирэдьиит биэрбит тэрилтэлэр бас билиигэ баар баайы-дуолу булан таһаардахтарына, судургу моҥкурууттааһыны мөккүһэн туруохтарын сөп. Оччоҕо иэһи сотторордооҕор буолуох, өссө ордук ороскуокка тэбиллиэххэ сөп. Онон моҥкурууттааһын судургу ньымата киһиэхэ барытыгар барсыбат.
Сонуннар
Ордук ааҕаллар
