«Мин идэм – ИТ» күрэх Москваҕа сүрэхтэниэҕэ

Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрбитинэн, сэтинньи 12 күнүгэр Москватааҕы ВДНХ балаһааккатыгар ыытыллар «Арассыыйа» норуоттар икки ардыларынааҕы быыстапка-форумҥа «Мин идэм – ИТ» күрэх сүрэхтэниэҕэ.

Тэрээһиҥҥэ куонкурус дирекцията ИТ-идэлэр трендэлэрин, итиэннэ буолан ааспыт регионнааҕы түһүмэхтэр  тустарынан кэпсиэҕэ, инники былааннарын үллэстиэҕэ.

Күрэх 2016 сыллаахха өрөспүүбүлүкэ көҕүлээһининэн тэриллибитэ уонна билигин регион үөрэнээччилэригэр уонна устудьуоннарыгар саамай баараҕай профориентационнай бырайыагынан буолар.

Бэлиэтээн этиллибитинэн, күрэх дойду бырабыыталыстыбатын бэрэссэдээтэлэ Михаил Мишустин өйөбүлүн ылан, быйылгыттан федеральнай таһымҥа таҕыста. Ол курдук, куонкурус быйыл Арассыыйа тоҕус субъегар ыытыллар уонна 25 тыһыынчаттан тахса кыттааччыны хабара былааннанар.

Регионнааҕы таһымҥа кыайыыны ситиспит кыттааччылар Москваҕа ыытыллар түмүк күрэхтэһиигэ барар путевканы ылыахтара, уопсай бириистээх пуонда – биэс мөлүйүөн солкуобай.