«Мин доруобуйам – мин талан ылыым»

Доруобуйа сылынан өрөспүүбүлүкэҕэ нэһилиэнньэҕэ өҥөнү оҥоруу эйгэтигэр тэрээһиннэр тиһиктээхтик ыытыллаллар. 
СӨ Үлэҕэ уонна социальнай сайдыыга министиэристибэтэ «Мин доруобуйам – мин талан ылыым» блокка икки тэрээһини хонтуруоллаан ыытар. 
Бастакыта – «Доруобуйа  калейдоскоба» диэн социальнай өттүнэн кутталлаах балаһыанньаҕа эбэтэр уустук усулуобуйаҕа олорор оҕолордоох дьиэ кэргэни 60% аҕыйаҕа суох хабар өрөспүүбүлүкэтээҕи марафон. 

Үлэҕэ уонна социальнай сайдыыга миниистир бастакы солбуйааччыта Иван Алексеев эппитинэн, бирикээс тахсан, сокуоннай саастарын ситэ илик оҕолорго социальнай-реабилитациялыыр, тулаайах уонна төрөппүт көрүүтэ суох хаалбыт оҕолорго көмөлөһөр кииннэргэ уонна нэһилиэнньэ социальнай көмүскэлин управлениеларыгар тэрээһиннэри ыытар график оҥоһуллубут. Билиҥҥи туругунан 196, ол эбэтэр 10% тахса дьиэ кэргэн хабыллыбыт. 
«Мин доруобуйам – мин талан ылыым» блогунан министиэристибэ социальнай өҥөлөргө наадыйар гражданнарга тус сыаллаах бырагыраамалары оҥорор. «Ити хайысханан биһиги социальнай өҥөлөргө наадыйар гражданнарга 3 тыһыынчаттан итэҕэһэ суох тус сыаллаах бырагыраамалары оҥоруохтаахпыт. Кэлэр сылтан өрөспүүбүлүкэҕэ уһун болдьоххо көрүү-истии ситимэ үлэҕэ киириэҕэ. Итиннэ бэлэмнэнэн 18 үлэһит «Сиделка» бырагырааманан үөрэннилэр. «Старость в радость» аһымал пуондатын суотугар 2 оройуонтан 29 үлэһит уонна 10 быраас үөрэннилэр», – диир Иван Алексеев. 
Бэс ыйын 1 күнүгэр 2779 социальнай өҥөнөн туһанааччы тус бэрэбиэркэлээһини ааста. Министиэристибэ иһинэн үлэлиир тэрилтэлэр сотрудниктара салгыы өрөспүүбүлүкэтээҕи 3 №-дээх клиническэй балыыһаҕа уонна ыарахан ыарыһаҕы көрөргө маастар-кылаастарга үөрэнэллэр. Уһун болдьоххо көрүү-истии 2022 сыл тохсунньу 1 күнүттэн үлэҕэ киириэхтээх.