«МИН – БРАЙЛИСПЫН» БЫРАЙЫАК НЕРЮНГРИ КУОРАККА

Саха Өрөспүүбүлүкэтин И.Н. Егоров-Горнай аатынан көрбөт уонна мөлтөхтүк көрөр дьон анал бибилэтиэкэтэ Нерюнгри куоракка харахтарынан доруобуйалара хааччахтаах дьону Брайль систиэмэтинэн суруйууга уонна ааҕыыга үөрэҕи саҕалаата.

Брайль систиэмэтэ харахтарынан доруобуйалара хааччахтаах дьон үөрэхтээх, билиилээх буолалларыгар биир сүрүн миэстэни ылар. Ол курдук өй, санаа сайдарыгар, ис турук чөл буоларыгар ааҕыы уонна суруйуу сабыдыала улахан.

Ааспыт сыл түмүгүнэн бибилэтиэкэ «Мин – брайлиспын» бырайыага «Росмолодежь» Арассыыйатааҕы бырайыактар күрэҕэр кыайыыны ситиспитэ. Бибилэтиэкэ тифлопедагога Сахаайа Дмитриевна Данилова «Мин – брайлиспын» үөрэҕи бэйэ айбыт үөрэтэр методикатынан салайан ыытар. Регион үрдүнэн маннык хабааннаах бырайыак бастакы буолар.

Нерюнгри куорат бибилэтиэкэтэ уонна Көрбөттөр уопсастыбалара бэлиэтииллэринэн, куорат олохтоохторун иһигэр харахтарынан доруобуйалара хааччахтаах дьон ахсаана сыллата элбээн иһэр. Бу бырайыак көмөтүнэн кинилэр Брайль сириибинэн суруйуу уонна ааҕыы тирэх сатабылларын баһылыахтара, ону тэҥэ тифлотехниканан туттар дьоҕурдарын сайыннарыахтара.

«Мин – брайлиспын» үөрэх өрөспүүбүлүкэ бибилэтиэкэлэрин уонна көрбөттөр уопсастыбаларын кытта тэҥҥэ биир үлэни ыытар инникигэ кэскиллээх бырайыак буолар.

Евгения ПОТАПОВА,

СӨ И.Н. Егоров - Горнай аатынан көрбөт уонна

мөлтөхтүк көрөр дьон анал бибилэтиэкэтин методиһа