Мин аҕам – барыларыттан бастыҥ!
Куонкуруска Уус Майа, Нам, Амма, Таатта, Хаҥалас, Эбээн Бытантай, Кэбээйи улуустарыттан уонна Дьокуускай куораттан олох араас очуругар түбэһэн оҕолорун соҕотоҕун иитэр аҥаардас аҕалар кыттыыны ылыахтара.
Кыттааччылар Ян Емельянов «Хомуур күрэх» диэн кэлиҥҥи кэмҥэ норуот биһирэбилин ылан эрэр спортивнай күрэххэ, ас астыырга, ырыаҕа-тойукка күөн көрсүөхтэрэ.
Тэрийээччилэр: СӨ Үлэ уонна социальнай көмүскэл министиэристибэтэ, «Аҥаардас аҕалар» СӨ уопсастыбаннай тэрилтэ, Хатастааҕы «Тускул» Култуура киинэ, Хатастааҕы «Алгыстаана» Дьахтар сэбиэтэ.
Бэлиэтээн эттэххэ, «Мин аҕам – барыларыттан бастыҥ!» күрэх быйыл иккис төгүлүн ыытыллар. Бастакы күрэх 2019 сыллаахха Дьокуускай куорат таһымынан буолан ааспыта. «Аҥаардас аҕалар» Саха Өрөспүүбүлүкэтин уопсастыбаннай тэрилтэтэ 2018 сылтан үлэлиир. Оҕолорун соҕотоҕун иитэр аҕалар уопсастыба бары олоҕор көхтөөх кыттыыны ылаллар, нэһилиэнньэ кыаммат араҥатыгар, кырдьаҕастарга тиэргэн хаарын ыраастааһыҥҥа, булууска муус киллэриигэ, Култуура уонна сынньалаҥ пааркатын ыраастааһыҥҥа бу сылларга элбэх субуотунньугу тэрийдилэр, олох ыараханыгар түбэспит биир кыһалҕалаахтарыгар аһымал кэнсиэр ыыппыттара.
«Мин аҕам – барыларыттан бастыҥ!» куонкурус бэстибээл буолар сирэ: Хатастааҕы «Тускул» култуура киинэ;
Бириэмэтэ: Күнүс 14.00 чаастан
Киириитэ: босхо
Сонуннар
Ордук ааҕаллар
