Медицина национальнай киинигэр үөрэҕирии балаһаакката арылынна

«Үөрэҕирии эйгэтин сайыннарар балаһаакката исписэлиистэр уонна төрөппүттэр ыкса алтыһар миэстэлэринэн буолуоҕа, оҕолор үөрэх үрдүк таһымыгар тахсалларыгар бэлэмнэнэн сайдалларыгар бары усулуобуйаны тэрийдибит», - диэтэ Үөрэҕирии миниистирин бастакы солбуйааччыта Алевтина Аргунова.

2014 сылтан саҕалаан дойду үрдүнэн «УчимЗнаем» балыыһаҕа сытан үөрэнэр оҕолорго аналлаах бырайыак олоххо киирэр. Ити бырагыраама стационарга эбэтэр дьиэлэригэр эмтэнэр, уһуннук уонна ыараханнык ыалдьар оҕолорго толору үөрэх эйгэтин тэрийиигэ туһуланар. Билиҥҥи кэмҥэ бырайыак Владивостоктан Калининградка диэри сылга 7000-тан тахса оҕо үөрэнэр 60 регионнааҕы балаһаакканы сомоҕолуур. Саха сиригэр «УчимЗнаем» федеральнай бырайыак 2018 сылтан үлэлиир.

Бырайыак чэрчитинэн медицина киинин «Күннээх куоратыгар» уонна педиатрическай киин оҕо онкологиятын салаатыгар икки үөрэх кэбиниэтэ бэлэмнэннэ.

Үөрэтэр уонна уруок таһынааҕы чаастары Дьокуускай куорат 35-с №-дээх оскуолата ыытар, иитэр үлэ тэрээһиннэрин Медицина национальнай киинин үлэһиттэрэ, эбии үөрэхтээһини өрөспүүбүлүкэ Саҥа технологияларга института хааччыйаллар.