МедиаКиин туһунан тугу билэҕин?

– Бэйэҥ тускунан кэпсээ.

– Мин М.К. Аммосов аатынан Хотугулуу-Илиҥҥи Федеральнай Университет Юридическай факультетын 3-с кууруһун устудьуонабын. Бэйэм Амма улууһун Эмис нэһилиэгиттэн төрүттээхпин. Ааспыт сыл ахсынньы ыйыттан ХИФУ ППОС МедиаКиинин салайабын.

– «Киин куорат» хаһыат «Тэтим» рубрикатын ааҕааччыларыгар МедиаКиин диэн туох тэрилтэ буоларын быһаарыаҥ дуо?

– ХИФУ ППОС МедиаКиинэ Саха сиригэр устудьуоннар хамсааһыннарыттан биир бөдөҥнөрө. Биһиги ППОС иһинэн буолар тэрээһиннэри, бырайыактары видеоҕа уһулан, хаартыскаҕа түһэрэн, таҥан оҥоробут. Ол аата бу эһиги куйаар ситимигэр көрөр университет туһунан  видеоларгыт, хаартыскаларгыт, постаргыт, ыстатыйаларгыт – барыта биһиги үлэбит түмүгэ диэххэ сөп. Ол эрээри биһиги манан эрэ муҥурдаммаппыт, бэйэбит эмиэ араас хабааннаах тэрээһиннэри, куонкурустары, бырайыактары тэрийэбит уонна кыттабыт.

– Бэрэссэдээтэл буолар санаа хайдах киирбитэй?

– Мин бу тэрилтэҕэ маҥнайгы кууруска киирбитим уонна онтон ыла олоҕум атын, сэргэх күннэрэ саҕаламмыттара. Барытыгар “Мин!” диэн көхтөөхтүк кыттарбын көрөннөр, бастаан бэрэссэдээтэли солбуйааччынан анаабыттара. Онтон бу кыһын, урукку бэрэссэдээтэл үлэтин түмүктээбитин кэннэ, мин салайааччы быһыытынан хаалбытым.

– Билигин, бэрэссэдээтэл буолбутуҥ кэннэ, дуоһунаһыҥ туһунан туох санаалааххыный?

– Оттон эрдэттэн солбуйааччы быһыытынан туох-хайдах буоларын, ымпыгын-чымпыгын билэн-көрөн, билигин арыый холкубун. Ол эрээри онтон ыла эппиэтинэс үрдээтэ диэхпин баҕарарбын, туох барыта эн нөҥүө кэлэр-барар.

– Үлэҥ үөрэххэр мэһэйдээбэт дуо?

– Барыта бэйэҕиттэн тутулуктаах дии саныыбын. Өскөтүн эн бириэмэҕин сөпкө аттаран сылдьар буоллаххына — барыта сатанар уонна табыллар. Онон мин эппиэтим: Суох, мэһэйдээбэт.

– Билигин МедиаКиин чилиэннэрэ тугунан дьарыктаналларый?

– ХИФУ ППОС үрдүнэн саамай улахан тэрээһиннэртэн биирдэстэрэ—«Субсидиум-24» буола турар. Онно 7 оҕом – тэрийээччи, оттон өссө 7 оҕом кыттааччы быһыытынан бардылар. Ону тэҥэ “Эдэр гвардия” «Вверх» диэн бырайыага буола турар, онно 2 оҕом эмиэ тэрийээччи быһыытынан сылдьаллар. Өссө биир устудьуоммут Аан дойдутааҕы ыччат бэстибээлигэр волонтер быһыытынан үлэлиир. Онон МедиаКиин активистара үлэ үөһүгэр сылдьаллар. Биһиги кинилэргэ тулууру, дьулууру уонна ситиһиини баҕарабыт. Ити курдук МедиаКиин үлэтэ бүппэт, ону барытын тэҥҥэ оҥоробут. Маны таһынан шоу-видеолары оҥоробут. Уонна атына кистэлэҥ буоллун, кэтэһиҥ эрэ диэхпин сөп.

– Быыс булан, өссө спордунан дьарыктанаргын истибитим.

– Үөрэхпиттэн уонна уопсастыбаннай үлэбиттэн ураты волейболлуубун, Куораттааҕы бастакы лигаҕа «Алтан» хамаандаттан оонньуубун, чөл, чэгиэн буоларга кыһаллабын уонна атыттары ыҥырабын. Уонна, быыс булан, доҕотторбун кытта көрсүһэрбин, тыйаатырдарга, кэнсиэрдэргэ сылдьарбын астынабын.

– Бу сылга үөрэххэ саҥа киирэр оҕолорго тугу сүбэлиэҥ этэй?

– Киһиэхэ устудьуоннуур кэмэ саамай умнуллубат, хатыламмат, ол эрээри бу барыта бэйэҕиттэн эрэ тутулуктаах. Мин баҕарыам этэ бэйэҕит баҕарбыт үөрэххитигэр киирэн, олох тэтимин кытта тэҥҥэ хардыылыыр сайдыылаах дьон буоларгытыгар! Туохтан да куттаммакка, тостубакка, иннигит диэки хардыылаан иһиҥ. Барыта табыллыа!