Матвей Лыткин Дьокуускай куорат уопсастыбаннай палаататын саҥа састаабын салайар

Тэрээһин мунньах үлэ регламенын олохтоото уонна салалтатын талла. Ол курдук, куоластааһын түмүгүнэн Дьокуускай куорат уочараттаах төрдүс Уопсастыбаннай палаататын бэрэссэдээтэлинэн Матвей Лыткин талылынна, солбуйааччыларынан — Любовь Баннова уонна Афанасий Федоров, маны сэргэ эппиэттиир сэкирэтээринэн Сардана Брызгалова талылынна.

«Улахан итэҕэлгит иһин махтанабын. Эрэлгитин түһэн биэрбэт туһугар кыһаллыахпыт. Уопсастыбаннай палаатаҕа куораппыт сайдарын, тупсарын, уопсастыба, бүтүн өрөспүүбүлүкэ туһугар тугу эрэ оҥорор баҕалаах дьон мустубута мэлдьэх буолбатах. Эһиги бэйэҕит эйгэҕитигэр профессионал дьоҥҥут. Онон, уопсастыба итэҕэлэ баарын тухары, нэһилиэнньэни долгутар кыһалҕалары туруорсан иһиэхпит», — диэтэ харда тылыгар Матвей Лыткин.

Куорат саҥа талыллыбыт Уопсастыбаннай палаататын чилиэннэрин баһылык Евгений Григорьев уонна Куорат дууматын бэрэссэдээтэлин бастакы солбуйааччы Евдокия Евсикова эҕэрдэлээтилэр.

Куорат баһылыга Евгений Григорьев олохтоох бэйэни салайыныы уорганнарын үлэтэ, бастатан туран, нэһилиэнньэ быраабын көмүскээһиҥҥэ уонна олоххо киллэриигэ туһуланарынан Уопсастабаннай палаата үлэтэ туох-хайа иннинэ куорат олохтоохторун баҕатын толорууга ананыахтаах диэтэ.

«Уопсастыбаннай палаата — куорат ситэриилээх былааһын — куорат дьаһалтатын, сокуону оҥорор уорганын – Куорат дууматын уонна нэһилиэнньэни ситимниир уорган. Уопсастыбаннай палаата чилиэннэрэ Олохтоох дьаһалта бары структураларын үлэлэрин-хамнастарын билсэр бырааптаахтар, Палаата бэрэссэдээтэлэ нэдиэлэтээҕи былаанныыр мунньахха сылдьар уонна ыйытыылары туруорар кыахтаах. Ол эбэтэр Уопсастыбаннай палаата куораты салайыыга быһаччы кыттыыны ылар. Онон бу улахан уонна сүҥкэн эппиэтинэстээх дуоһунаһы сүкпүккүтүнэн эҕэрдэлиибин уонна сөбүлэспиккитигэр махтанабын», — диэтэ Евгений Григорьев.

Куорат дууматын бэрэссэдээтэлин бастакы солбуйааччы Евдокия Евсикова эмиэ бэйэтин эҕэрдэ тылыгар бу үлэ дириҥ суолтатын тоһоҕолоото.

«Хас биирдиигитин Уопсастыбаннай палаата чилиэнэ буолбуккутунан эҕэрдэлиибин. Бу олус үрдүк чиэс уонна эппиэтинэс. Тоҕо диэтэххэ эһиги куорат хас биирдии олохтооҕун, үлэ тэрилтэтин, уопсастыбаннай хамсааһыннарын интэриэһин көмүскүүгүт. Эһиги көрүүгүт, киллэрэр этиилэргит куораты салайыыга, олохпут уйгутун тупсарыыга олус суолталаахтар. Куорат олохтоох дьаһалтата уонна Куорат дуумата бэйэлэрин былааннарын эһиги үлэҕитигэр олоҕуран торумнаналлар. Онон хас биирдиигититтэн куорат кэлэр кэскилэ быһаччы тутулуктаах», — диэтэ Евдокия Евсикова.

Бэлиэтээн эттэххэ, Куорат уопсастыбаннай палаатата 21 киһилээх. Олортон 7 киһини куорат баһылыга бигэргэтэр, 7 киһини – Куорат дуумата, 7 киһини уопсастыбаннас киллэрэр.

Дьокуускай куорат Уопсастыбаннай палаататын саҥа састааба

Куорат баһылыга киллэрбит дьоно:

1. Елена Аммосова, блогер, суруналыыс;

2. Любовь Баннова, «Дьокуускайдааҕы килиэп собуота» АУо идэлээх сойууһун бэрэссэдээтэлэ;

3. Иван Мещеряков, «Дьокуускайдааҕы казактар хамаандалара» уопсастыба атамаана;

4. Алексей Пинигин, «Прогресс» ХЭТ дириэктэрэ;

5. Филипп Сизых, предприниматель;

6. Николай Тряпша, Дьокуускай куорат бэтэрээннэрин сэбиэтин бэрэссэдээтэлэ;

7. Афанасий Федоров, М.К. Аммосов аатынан ХИФУ «Экономика и финансы» кафедратын доцена;

Дьокуускай куорат Дуумата киллэрбит дьоно:

1. Дмитрий Алексеев, Дьокуускайдааҕы медицинэ колледжын дириэктэрэ;

2. Нина Горбунова, «Северные звездочки» 15 №-дээх оҕо саадын сэбиэдиссэйэ;

3. Пелагея Прядезникова, Дьокуускайдааҕы «Үһүс саас оскуолата» уопсастыбаннай тэрилтэ бэрэссэдээтэлэ;

4. Алексей Семенов, «Вектор» тырааныспар хампаанньатын дириэктэрэ;

5. Максим Трофимов, «Теплоэнергосервис» АУо генеральнай дириэктэрэ;

6. Александр Чудиновских, «Центр глобального образования» гимназия МОБУ дириэктэрэ;

7. Олег Шемякин, «Стройблок» ХЭТ тэхиньиичэскэй дириэктэрэ.

Куорат уопсастыбаннай тэрилтэлэрэ киллэрбит кандидаттара:

1. Александр Берзюков, блогер, предприниматель;

2. Сардана Брызгалова, СӨ геокултуурунай сайдыы институтун отделын салайааччыта;

3. Александр Данилов, «Киин» киинэ тыйаатырын генеральнай дириэктэрэ;

4. Наталья Луковцева, 203-с микрооройуон старосталарын сэбиэтин бэрэссэдээтэлэ;

5. Матвей Лыткин, «Трезвая Якутия» уопсастыбаннай хамсааһын бэрэссэдээтэлэ;

6. Сардана Протодьяконова, «Саха» НКИХ режиссера;

7. Григорий Сеялов, бойобуой дьайыылар бэтэрээннэрэ, СӨ байыаннай комиссариатын салаатын начаалынньыга.

Матвей Лыткин, Дьокуускай куорат уопсастыбаннай палаататын салайааччыта:

— Куорат олохтоохторун бүгүҥҥү саамай долгутар кыһалҕалара тугуй?

— Бу сайыны быһа ыытыллыбыт суол-иис өрөмүөнэ хаһан тохтууруй диэн саамай сытыы боппуруос. Итини кытта 203-с дьоҕус оройуоҥҥа арыгы туочуката наһаа элбээтэ диэн улахан кэпсэтии буола турар. Куорат олохтоохторо ити боппуруоһу сытыытык туруораллар. Кинилэри кытта көрсүһүүгэ куорат баһылыга Евгений Григорьев барытын сиһилии быһааран, көрдөрөн, дьоннор өйдөөтүлэр. Куоракка ылыллыбыт хааччахтааһын сокуоннарыттан сорохторо балаҕан ыйын 1 күнүттэн олоххо киириэхтээхтэр. Ол кэнниттэн эмиэ түмсүөхпүт диэн сүбэлэһэн тарҕастыбыт.

— Туохха болҕомтону уурар былааннааххытый?

— Саҥа састаап тэриллибиппит нэдиэлэ эрэ буолла. Билигин саҥа талыллыбыт уопсастыбаннай палаата чилиэннэрин, ким ханныкка ордук сөп түбэһэрин көрөн, хамыыһыйаларга араарыахпыт. Кинилэр бары уопсастыбаннай тэрилтэлэртэн кэлбит дьон, онон ханнык боппуруос ордук сытыытык турарын билэллэр, онон көрөн дьон олоҕун-дьаһаҕын тупсарар, чэпчэтэр боппуруостары көтөҕө сатыахтаахпыт.  Сорох боппуруостар кып-кыраттан иҥнэн тураллар. Холобур, бэрт соторутааҕыта Хайыһар федерацията биир кыһалҕаны быһаарарга көрдөстө. Владимировкаҕа хайыһар трассата докумуона оҥоһуллубакка, федерация итиннэ кыайан үлэни ыыппакка турар. Онно, дьиҥэр, үлэ барбыта ыраатта эрээри, баччааҥҥа диэри баһаарыллыбакка турар.  Мин бэйэм спортсмен буоларым быһыытынан пааркаҕа универсальнай сүүрүү, хаамыы суолун оҥорууга үлэлэһэр былааннаахпын. Ити боппуруос бачча сыл тухары быһаарыллыбакка турар.

— Нэһилиэнньэни кытта хайдах бэрээдэктээхтик үлэлиигит, этиилэрин хайдах хомуйаҕыт?   

— Туох баар коммуникацияны барытын туһанан сибээскэ баар буолуохпут. Олохтоох дьаһалтаҕа уопсастыбаннаһы кытта үлэлиир салаа баар. Ити салааны кытта ыкса сибээстээхтик үлэлиэхпит уонна палаатабыт чилиэннэрэ бары куорат уопсастыбанньыктара буолалларын быһыытынан бары норуоту кытта ыкса сибээстээх дьон. Мин бэйэм, холобур, «Трезвость» уопсастыбаҕа 20-тэн тахса сыл баарбын, ити уопсастыба чилиэннэрэ куорат иһигэр туох кыһалҕа баарын, сытыы боппуруостары барытын билэбит.

«Киин куорат» ыспыраапката: 
Куорат уопсастыбаннай палаататын бу иннинээҕи Андрей Высоких салайааччылаах састааба ааспыт үс сыллаах үлэтин отчуотугар биир сүрүн кыайыыларынан арыгыны атыылыыр маҕаһыыннары социальнай, култуурунай тэрилтэлэртэн ыраах олохтооһун, элбэх кыбартыыралаах олорор дьиэлэр тастарыгар уопсастыбаннай аһылык тэрилтэлэрин арыйыыны бобууну ааттаабыттара. Араас сылларга Уопсастыбаннай палаата састаабыгар Култуура уонна сынньалаҥ пааркатын дириэктэринэн үлэлээбит Николай Мартынов, билиҥҥи Дьокуускай куорат Үөрэҕин управлениетын начаалынньыга Мария Петрова, суруналыыстар Алена Алексеева, Дмитрий Аргунов, Антон Жондоров, предприниматель Артур Эм, Дмитрий Хватов, Наталья Луковцева, Александра Федорова, Лидия Афанасьева, Наталья Иванова, Андрей Чупиков, Гаврил Чемоханов, Анатолий Сивцев о.д.а. курдук олох араас эйгэтин бэрэстэбиитэллэрэ үлэлээбиттэрэ. Палаатаны Б.А. Горбатюк, Х.Н. Дьяконов, А.В. Высоких салайбыттара. Уопсастыбаннай палаата сүрүннээн түөрт хамыыһыйанан үлэлиир: 1. Гражданскай уопсастыбаны уонна олохтоох бэйэни салайыныыны сайыннарыы хамыыһыйата; 2. Социальнай боппуруостарга хамыыһыйа; 3. Куорат хаһаайыстыбатын тутууну уонна предпринимательствоны сайыннарыы хамыыһыйата; 4. Наукаҕа, инновацияларга уонна аграрнай политикаҕа хамыыһыйа.