Маастар-былаан оҥоһуутугар 35 хампаанньа кыттар

Өрөспүүбүлүкэбит киин куоратын маастар-былаанын оҥоһуутун куонкуруһугар Арассыыйа уонна Армения алта куораттарыттан 35 хампаанньа кыттар буолла. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Куонкуруска Москваттан 18, Дьокуускайтан тоҕус,  Санкт-Петербургтан түөрт, Воронежтан, Реутовтан, Смоленскайтан уонна Еревантан биирдии хампаанньа кыттар буолла. 
«Дьокуускай куорат маастар-былаана биһиэхэ улахан суолталаах, кини куораты тутуу сайдыытыгар уонна куорат олоҕун былааннааһыҥҥа төрүтүнэн буолуоҕа», — диир Саха сирин Ил Дарҕана Айсен Николаев.
Куонкурус кыттыылаахтара masterplan-yakutsk.ru сайтка регистрацияланнылар, бырайыактарын портфолиотын уонна территорияны сайыннарыы идиэйэлэрин эссетын көрдөрдүлэр. 
Кулун тутар 31 күнүгэр дьүүллүүр сүбэ үс финалиһы сүүмэрдиэҕэ, бырайыактары кинилэр оҥоруохтара. Куонкурус түмүгэ от ыйын 13 күнүгэр биллиэҕэ.