Маастар-былаан биир сүрүн соруга — инфраструктураны сайыннарыы

Олунньу 26 күнүгэр буолбут СӨ ЫБММ үлэһиттэрин иннигэр отчуокка баһылык Евгений Григорьев куорат маастар-былааныгар 450 млрд солкуобай уопсай суумалаах уонунан социальнай, инженернэй уонна тырааныспар инфраструктуратын эбийиэгэ тутуллара күүтүллэрин иһитиннэрдэ. 
Евгений Григорьев маны сэргэ ааспыт 2023 сылга киин куорат социальнай гаастааһын былаанын аһары толорбута, ардах уутун сүүрдэр ситим схемата оҥоһуллубута биир тыын кыһалҕаны быһаарыыга дьоһун хардыы буоларын, «Водоканал» АУо 3 №-дээх канализация коллекторын, 5 №-дээх уу ситимин тутууну түмүктээбитин санатта.
«Ол аата куорат соҕуруу өттө урутаан сайдар, саҥа олорор кыбаарталлары, социальнай, промышленнай тэрилтэлэри туттарар  кыахха киирдэ»,– диэн бэлиэтээтэ Евгений Григорьев.
Маны сэргэ 2021-2023 сылларга ыытыллыбыт Үс сыллаах тупсарыы ситиһиилээх уопутун хатылаан, 2024-2026 сылларга аны Инфраструктураны сайыннарыы үс сыла саҕаламмытын тоһоҕолоото. Маныаха сүрүн болҕомто уопсастыбаннай тырааныспар тиһигин тупсарыыга, уулусса-суол ситимин сырдатыыга, уу ситимин оҥорууга, күөллэри ыраастааһыҥҥа, социальнай гаастааһыҥҥа, элбэх оҕолоохторго бэриллэр сирдэр инфраструктураларын тэрийиигэ ууруллуохтааҕын бэлиэтээтэ.
«Бу үлэ барыта маастар-былааны кытта ситимнээх уонна биһиги куораппытыгар олох таһыма үрдүүрүгэр туһуланар»,– диэтэ Евгений Николаевич.
Отчуот кэнниттэн баһылык ЫБММ үлэһиттэриттэн киирбит  үөрэхтээһиҥҥэ, куораты тупсарыыга, уу ситимнэрин оҥорууга сыһыаннаах ыйытыыларга хоруйдаата, диэн иһитиннэрэр Олохтоох дьаһалта пресс-сулууспата.