Лицей саҥа куорпуһа тутуллар

Киин куорат баһылыга Евгений Григорьев Саха политехническай лицей саҥа куорпуһун тутуутун тиийэн көрдө-иһиттэ, үлэ хаамыытын бэрэбиэркэлээтэ. Былаан быһыытынан тутуу 2024 сыл IV кыбаарталыгар түмүктэниэхтээх.

Олохтоох дьаһалта пресс-сулууспата иһитиннэрбитинэн, билиҥҥи туругунан эбийиэк тутуутун бэлэмэ 60% кэриҥэ. Сакаасчыт – «Главстрой» муниципальнай хааһына тэрилтэтэ.

Үс мэндиэмэннээх саҥа дьиэ бырайыагынан 326 миэстэлээх. Уопсай иэнэ – 5,5 тыһыынча кв. миэтэрэттэн тахса. Манна оҕолору үөрэтэр уонна идэҕэ бэлэмниир 30 кэбиниэт баар буолуоҕа. 

Билиҥҥи туругунан эбийиэккэ бастакы этээс муостата оҥоһуллар, ис өттө тупсарыллар, эркиннэрин штукатуркалаан бүтэрбиттэр, үлэ иккис этээскэ салҕанар. Ититии, канализация, сантехника  систиэмэлэрин турбаларын таҥаллар, уот ситимин хаабылларын тардаллар. Лермонтов уулуссатын өттүттэн киирэр сир тупсарыллар.

Санатан эттэххэ, лицей саҥа куорпуһун тутуу быйыл саҕаламмыта, сыл бүтүүтэ үлэҕэ киирэрэ былааннанар.

Хаартыска: yakutskcity.ru саайт