Ленскэй оскуолалара олохтоох бородууксуйанан аһыыллар

Ил Дархан Айсен Николаев Ленскэйгэ былырыын үүт собуотун баазатыгар тэриллибит оскуола аһын-үөлүн комбинатыгар сырытта. Собуот аһыллыаҕыттан куорат бары оскуолалара оҕолору биир менюнан аһаталлар.

Саха сиригэр итинник бырайыагы үлэҕэ киллэриигэ Ленскэй улууһа иккиһинэн ааҕыллар. Урут маннык бырайыак Чурапчы улууһугар олоххо киирбитэ.
«Өрөспүүбүлүкэҕэ бу иккис комбинат. Кэлэр өттүгэр маннык бырайыактары Саха сирин атын оройуоннарыгар эмиэ тарҕатыахха сөп дии саныыбын», – диир Айсен Николаев.
Ленскэйгэ оскуола аһылыгын менютун 75% олохтоох бородууксуйаттан турар. Билигин комбинат 6 оскуоланы хааччыйар. «Оҕолорго уонна төрөппүттэргэ ыытыллыбыт ыйытык бары аһынан-үөлүнэн астыналларын көрдөрдө. Мин эмиэ амсайдым, чахчы, дьиэ аһылыгын кэриэтэ олус минньигэс», — диэн өрөспүүбүлүкэ баһылыга санаатын үллэһиннэ.

Салгыы Айсен Николаев куорат оскуолаларыгар сарсыарда ахсын тиэрдиллэр эт полуфабрикаттарын оҥорор сыах үлэтин кытта билистэ. Сменаҕа барыта 2,5 тыһыынча куурусса, эт уонна балык полуфабрикаттара оҥоһуллаллар.
Кэлэр өттүгэр повардар үлэлэрин чэпчэтэргэ манна оҕуруот аһын сыаҕын үлэлэтэри былаанныыллар: кырбастаммыт хортуоппуй, хаппыыста, сүбүөкүлэ уонна моркуоп арааһын вакуумҥа суулаан тиэрдиэхтэрэ.

Санатан эттэххэ, ааспыт сыл ахсынньы ыйыгар Айсен Николаев Ил Түмэҥҥэ туһаайыытыгар оҕо уһуйааннарын, оскуолалары, балыыһалары, социальнай тэрилтэлэри хаачыстыбалаах бородууксуйанан хааччыйыы саҥа ньымаларын киллэрии наадатын ыйбыта. Олохтоох ас-үөл чааһа судаарыстыбаннай атыылаһыыга 25 %-тан итэҕэһэ суох буолуохтаах, оттон муниципальнай тэриллиилэринэн — 50 %-ҥа диэри, диэн иһитиннэрэр Ил Дархан уонна Бырабыыталыстыба пресс-сулууспата.

Андрей Сорокин хаартыскаҕа түһэриитэ, СИА