Ленин проспегын уонна Аммосов уулуссатын быһа охсуһууларынан тырааныспар сырыыта саҕаланар

Тырааныспар сырыытыгар табыгастаах усулуобуйаны оҥорор сыалтан ыам ыйын 25 күнүттэн Дьокуускай куоракка быстах эрэсииминэн Ленин проспегын уонна Аммосов уулуссатын быһа охсуһууларынан тырааныспар сырыыта саҕаланара былааннанар. Бу туһунан Олохтоох дьаһалта пресс-сулууспата иһитиннэрдэ.
Ыам ыйын 27 күнүгэр 5-7 күҥҥэ Киров уулуссатын уонна Ленин проспегын быһа охсуһууларыгар, сир үлэтинэн сибээстээн, тырааныспар сырыытыгар хааччахтааһын киирэр.
Ленин проспегын уонна Курашов уулуссатын быһа охсуһуулара ыам ыйын бүтэһигэр арыллара былааннанар. Эбийиэккэ гаас ситимин саҥа турбата киллэриллиэхтээх. Үлэ график быһыытынан баран иһэр. 
Ленин проспегын устун тротуар эргэ плиткаларын көтүрэллэр. Көтүрүллүбүт плиткалары куорат салалтатын территориальнай уорганнарыгар уокуруктар тротуардарын өрөмүөннэригэр туттарга биэрэллэр.