Ленин проспегын көҕөрдүүгэ 30 мөл.солк. көрүллүбүт

Сааскы көҕөрдүү хампаанньата саҕаланна. Сүрүн уонна сонун үлэнэн саҥа өрөмүөннэнэн бүтүөхтээх Ленин проспегын көҕөрдүү буолар. Бу сыалга 30 мөл. солк. кэриҥэ үп тыырыллыбыт. Бу үпкэ, мастары уонна сэппэрээктэри киллэрэн туран, 5 тыһыынча кэриҥэ ахсааннаах күөх үүнээйини олордор былаан баар. Маны сэргэ, «Главстрой» МХТ иһитиннэрэринэн, газон оҥоһуллар. Ол курдук, тэрилтэ суол тутуутугар салаатын сүрүн исписэлииһэ Денис Стецюк бэлиэтииринэн, Ленин проспегын көҕөрдүү икки түһүмэҕинэн ыытыллар. Бастакы түһүмэх ааспыт нэдиэлэттэн, ыам ыйын 19 күнүттэн бэс ыйын 15 күнүгэр диэри салҕанар. Иккис түһүмэх, күһүҥҥү олордуу, атырдьах ыйыттан балаҕан ыйын 15 күнүгэр диэри ыытыллар. 
Быйыл олордуу үүнээйи буорун састаабыгар хаһааҥҥытааҕар даҕаны болҕомтолоох сыһыан күүтүллэр. Ол курдук, кэлии буорга кумах эбэн уонна эрдэттэн уоҕурдуу кутан оҥорор соруктаахтар. Ону сэргэ үүнээйини олордон баран сиигин тутар гына мульча куталлар уонна биирдии маска 30 л тиийэ ууну куталлар. Өссө биир хайҕаллаах суол -- урукку үүнэн турар мастары төһө кыалларынан тыыппакка буола сатыыр соруктаахтар. 
Киин куораты саҥалыы көҕөрдүү биир уратыта -- быйыл үлэ  Хотугулуу-Илиҥҥи федеральнай университет Ботаническай саадын исписэлиистэрин салалтатынан ыытыллар. Ботаническай саад дириэктэрэ Наталья Иванова иһитиннэрбитинэн, үгэс буолбут мастары сэргэ яблоня, сирень, боярышник, черемуха курдук урукку өттүгэр куораты көҕөрдүүгэ киэҥник туһанылла илик сэдэх, өлгөмнүк сибэккилиир, ол иһигэр отонноох мастары талбыттар. Күөх көрүө быһыытынан спирея, дөлүһүөн, акация туттуллар буолбут.