27.09.2023 | 17:00

Лөгөй оҕуруотчуттарын түбүктэрэ тохтообот

Кинилэр бары – ыал ийэлэрэ, эбэлэрэ, сатабыллаах хаһаайкалар. Уус Алдан улууһун Лөгөй нэһилиэгин Күбэй хотуттара күннээҕи түбүктэн ордон, кэрэни кэрэхсээн сибэкки, мас, оҕуруот арааһын олордон, бүөбэйдээн, сайынын дьиэ дьонун күндүлээн, ылсан-бэрсэн, санаа атастаһан, биир сүбэнэн олороллор.
Лөгөй оҕуруотчуттарын түбүктэрэ тохтообот
Ааптар: Наталья Кычкина
Бөлөххө киир

Ону таһынан бөлөхтөрүгэр кэпсэтиинэн, уопут атастаһыынан эрэ муҥурдамматтар, араас аахсыйа тэрийэн ыыталлар, кыамматтарга көмөлөһөллөр, дьаарбаҥкалары тэрийэллэр. Бөлөхтөрө оҕуруот хомулунна диэн тохтоон хаалбат, аны билигин күһүҥҥү кэмҥэ мастары олордуу, тууһааһын, кыһыҥҥы хаһаастар ырысыаптарын ылсыы-бэрсии дьэ саҕаланна.

Элбэҕи суруйа барбакка, бөлөх салайааччыта, Лөгөй орто оскуолатын нуучча тылын уонна литературатын учуутала, СӨ үөрэҕириитин туйгуна, РФ үөрэҕириитин бочуоттаах үлэһитэ, Учууталлар учууталлара Надежда Егоровна Бурнашева кэпсээнин истиэҕиҥ:

– 2019  сылга бассаап бөлөх арыйбытым. Онно ким баҕалаах, оҕуруотчуттар, оҕуруот олордуон баҕалаахтар киирбиттэрэ. Сыл аайы элбээн испиппит. Тугу билэрбитинэн бэйэбит уопуппутуттан үллэстэрбит, арассаада атыылыырбыт, атастаһарбыт.

Быйыл  сүбэлэһэн баран  “Лөгөй оҕуруотчуттара” диэн ааттанан  түмсүү тэринэргэ быһаарыммыппыт. Бөлөхпүтүгэр 118 киһи баар. Тохсунньу ыйга оҕуруот аһын, сибэкки олордуутун тиэмэтигэр биир дойдулаахпыт, агроном идэлээх Мария Семеновна Мигалкина сүбэ-ама биэрбитэ, араас сиэмэлэри, уоҕурдуу атыылаабыта. Саас ыам ыйыгар кырдьаҕастарга, кыамматтарга, инбэлииттэргэ, СВОҕа сылдьааччылар ийэлэригэр “Сүрэхпит сылааһын бэлэх уунабыт” диэн аахсыйа тэрийбиппит. Аахсыйаҕа 60-ча оҕуруотчут кыттыыны ылан, сибэкки, оҕуруот аһын арассаадатын бэлэх ууммуппут. Маны таһынан дэриэбинэбит сибэккинэн киэркэйэригэр Кыайыы болуоссатыгар, Суоппардар сквердэригэр сибэкки олордубуппут.

Быйыл  аан бастакытын  “Бастыҥ оҕуруот уонна саад” диэн күрэх тэрийдибит. Манна 4 номинациянан барыта 13 хаһаайка кытынна. Биир дойдулаахтарбыт (Наталья Кычкина, Мария Аманатова), эр дьон түмсүүтүттэн (Анатолий Бурнашев, Петр Перевалов, Захар Колодезников) “Саһарҕа” түөлбэ, олохтоох дьаһалта, маҕаһыыннар (“Семья”, “Сардаана”), П.П. Оготоев аатынан сынньалаҥ киинэ спонсордаатылар, күүс-көмө буоллулар. Бу күрэҕи эһиилги сылга эмиэ тэрийэн ыытар былааннаахпыт.

Соторутааҕыта икки түмсүү кыттыһан “Көмүс күһүн бэлэҕэ”  норуот күүлэйин тэрийдибит. Оҕуруот аһын быыстапката, араас күрэхтэр, “Корзина добра” аахсыйа ыытылынна. Онно барыта 38 оҕуруотчут кыттыыны ылла.

Маны таһынан нэһилиэкпит дьонугар араас мастары сакааһынан аҕалан атыылаатыбыт, мантан инньэ Кыайыы болуоссатыгар уонна Суоппардар сквердэригэр мас олордуутун саҕалыыбыт.

Сонуннар

Ордук ааҕаллар

Оҕуруо абылаҥар ылларбыт Роза Спиридонова
Дьон | 31.05.2024 | 14:00
Оҕуруо абылаҥар ылларбыт Роза Спиридонова
Роза Яковлевна Спиридонова Дьокуускай куорат 39 №-дээх «Ромашка» уһуйааныгар музыкальнай салайааччынан үлэлиир. Бүгүҥҥү сэһэргэһээччим, чахчы, талба талааннаах киһи. Кини оҕуруонан үлэлэрэ ханнык да көмүс оҥоһуктан хаалсыбаттар. Роза Яковлевна Ньурба Маалыкайыттан төрүттээх. Эбэтэ уонна ийэтэ суохтан баар оҥорор, кыраттан да элбэҕи айан таһаарар, эргэни саҥа тыынныыр сатабыллаах хаһаайкалар, көмүс тарбахтаах иистэнньэҥнэр...
Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...