Кыстыкка бэлэмнэнии — дьаһалта хонтуруолугар

Птицефабрика оройуонугар саҥа хочуолунай

Баһылык маҥнай Птицефабрика оройуонугар тутулла турар үрдүк кыамталаах хочуолунайы тутуу хаамыытын билистэ. Саҥа эбийиэк «Теплоэнергия» тэрилтэ күүһүнэн тутуллан түмүктэнэн эрэр.

Санатан эттэххэ, Птицефабрикаҕа маҥнайгы хочуолунай 1969 сыллаахха үлэҕэ киирбитэ. Хочуолунай бу күҥҥэ диэри бүтүн оройуону хааччыйан кэллэ эрээри, сыл-хонук ааһан, эргэрэн, быйыл саҥа хочуолунайы тутар туһунан быһаарыы ылыллан, номнуо 10-нуу киловатт кыамталаах үс улахан оһох турбут.

«Носуостары, ититэр систиэмэни холбооһун уонна ис үлэ ыытыллар. Алтынньы 1 күнүгэр диэри үлэ түмүктэниэҕэ дии саныыбыт. Быйыл хочуолунай боруобалааһын быһыытынан үлэлиэҕэ. Оттон кэлэр 2024-2025 сс. манна 300 дьиэ холбонуоҕа»,– диир «Теплоэнергия» генеральнай дириэктэрэ Михаил Воробьев.

Сүрүн эппиэтинэс – салайар хампаанньаҕа

Иккис эбийиэгинэн Крупская уул., 37 турар элбэх кыбартыыралаах дьиэ хочуолунайа буолла.

Бэлиэтээн эттэххэ, Дьокуускай куорат үрдүнэн 34 элбэх кыбартыыралаах дьиэ тус хочуолунайдаах. Эбийиэк дьиэни бас билээччилэр уопсай сөбүлэҥнэринэн тутуллар.

Крупская, 37 дьиэни «Ир-Строй» салайар хампаанньа көрөр. Салайар хампаанньа бэрэстэбиитэлэ эриэйдэ кыттыылаахтарыгар кэлэр сылга сөптөөх дуогабар түһэрсиллибитин, оттукка бэлэм туһунан аактаҕа илии баттаммытын иһитиннэрдэ.

«Хочуолунай төһө даҕаны дьиэни бас билээччилэр суоттарыгар  сылдьыбытын иһин, көрөөччү-истээччи, эппиэтинэһи сүгээччи – салайар хампаанньа»,– диэн Евгений Николаевич тоһоҕолоон бэлиэтээтэ.

Строительнай уокурукоттук сезонугар эппиэтинэстээхтик сыһыаннаһар

Түмүккэ баһылык Евгений Григорьев Свердлов уул., 3/3 турар элбэх кыбартыыралаах дьиэҕэ сырытта.

«Единство» салайар хампаанньа бэрэстэбиитэллэрэ дьиэ оттук сезонугар  бэлэмин туһунан иһитиннэрдилэр. Ол эбэтэр халлаан 8 кыраадыстан тымныйда даҕаны, биэс суукка иһинэн сылааһы биэрэргэ бэлэмнэр.

«Строительнай уокуругу быйылгы оттук сезонугар бэлэмнээһиҥҥэ күүстээх үлэ барар. Ол курдук бары салайар хампаанньалары уонна ордук чуолаан социальнай эбийиэктэри тус хонтуруолга тутабыт. Үөрэх, доруобуйа харыстабылын тэрилтэлэрэ балаҕан ыйын 1 күнүгэр диэри ититии ситимигэр холбонуохтаахтар»,– диэн иһитиннэрдэ уокурук баһылыга Василий Пинигин.

Дьокуускай куорат территориятыгар 2945 элбэх кыбартыыралаах дьиэ баар. 2023-2024 сс. оттукка бэлэмнэнии 75% тэҥнэһэр.

«Күн сардаҥата» сэрэхтээх буолууга болҕомто уурбут

Салгыы хамыыһыйа Дзержинскэй уул., 79 «Күн сардаҥата» уһуйааҥҥа  айанныыр.

Уһуйаан сэбиэдиссэйинэн ахсыс сылын Октябрина Ушницкая үлэлиир. Быйылгы үөрэх дьылыгар сэттэ бөлөххө 260 оҕону ылаары бэлэм олорор.

«Билиҥҥитэ ЫБММ, баһаарынай сулууспа уонна Роспотребнадзор сөбүлэҥнэрэ баар. «Охранная сигнализация» диэн баһаарынай чаас систиэмэтэ холбонно, маннык оборудованиены Клара Цеткин уулуссатыгар баар филиалбытыгар эмиэ туруортардыбыт. Маны таһынан лаампалары уларыттыбыт уонна видеонан кэтээн көрүүнү туруортардыбыт»,– диир «Күн сардаҥата» уһуйаан салайааччыта Октябрина Ушницкая.

Дьокуускай куорат социальнай эбийиэктэрин 90-тан тахса бырыһыана кыстыкка бэлэм. Балаҕан ыйын 1 күнүгэр диэри бары эбийиэктэргэ итии бэриллэр.

Дьокуускай куорат кыстыкка бэлэм

Эриэйдэ уопсайа түөрт социальнай эбийиэккэ сырытта. Бары эбийиэктэр балаҕан ыйын 1 күнүттэн сылааска холбонорго бэлэмнэр.

«Дьокуускай куорат кыстыкка бэлэм. Балаҕан ыйын 1 күнүттэн бары социальнай эбийиэктэр ититии ситимигэр холбонуохтара, олорор дьиэлэргэ эмиэ халлаан туругуттан көрөн ититии кэмигэр бэриллиэҕэ»,– диэн Евгений Николаевич бэрэбиэркэ түмүгүнэн иһитиннэрдэ.