13.11.2020 | 17:43

КЫРГЫТТАР СУРАҔА СУОХ СҮТЭЛЛЭР...

КЫРГЫТТАР СУРАҔА СУОХ СҮТЭЛЛЭР...
Ааптар: Киин Куорат

Ааспыт икки нэдиэлэ устата Дьокуускайга  5 кыыс сүттэ. Социальнай ситимнэргэ, сонуннарга сүппүт дьон туһунан иһитиннэрии ордук түргэнник тарҕанар. Бу маассабай дьон сүтүүтэ дуу, олохпутугар наар баар хартыына дуу?

Алтынньы 28 күнүгэр 32 саастаах Анна Городкова сураҕа суох сүппүтэ. Бүтэһигин авиапорт оройуонугар көрбүттэр. Кыыс инбэлиит, Психо-неврологическай диспансерга учуокка турар. Бэҕэһээ полиция иһитиннэрбитинэн , кыыс көстүбүт.

***

Алтынньы 30 күнүгэр 31 саастаах Инесса Попова сүппүтүн туһунан иһитиннэрии тарҕаммыта. Дзержинскэй уулуссатыгар баар дьиэтиттэн “Апельсин” атыы-эргиэн киинигэр тахсан баран төннөн кэлбэтэх. Дьиэтин аттыгар баар аптека анныттан өлүгэ көстүбүтэ. “Киһи илиититтэн буолбатах” диэн информацияны тарҕанна.

***

Алтынньы 31 күнүгэр 19 саастаах Ирина Семенова сүттэ диэн бастаан ийэтэ аймаммыта, социальнай ситимнэринэн биллэрии түргэнник тарҕаммыта. Кыыс киэһэ хойут Автодорожнай уулуссаҕа баар дьиэтиттэн тахсан баран төннүбэтэх, дьонугар биллибэтэх.

Кыыс сарсыҥҥы күнүгэр тута көһүннэ. Онон дьоно “сураҕа суох сүппүттэр испииһэктэригэр киллэрбэккитигэр көрдөһөбүт” диэн суругу тарҕаттылар. Ирина көннөрү бэйэтэ соҕотох буола түһээри дьиэтиттэн тахсан барбыт диэбиттэр.

***

Сэтинньи 5 күнүгэр 37 саастаах Татьяна Андреева ууга тааһы бырахпыттыы сүттэ. 2 оҕолоох ийэ, кэргэнэ тыа сиригэр үлэлии сылдьар кэмэ эбит. Алтынньы 5 күнүгэр маҕаһыыҥҥа бараары сүппүт. Сорох биллэриигэ сарсыарда, сороххо түүн тахсан барбыт диэбиттэр. Хатыҥ Үрэхтэн массыынанан айаннаабыт. Массыыната суол кытыытыгар хаарга анньыллан, дьиэтин чугаһынан көстүбүт, суотабайа онно хаалбыт эбит.

Кэнники тарҕаммыт информациялартан сылыктаатахха, ханнык эрэ базаҕа киирэн көмө көрдөөбүт, “Крытай” ырыынакка көрөн аһарбыттар...

Бэлиэтээн этэххэ, сүппүт кыргыттартан билиҥҥитэ киниэхэ эрэ холуобунай дьыала тэрилиннэ.

Дьокуускайдааҕы силиэстийэлиир кэмитиэккэ кэпсээбиттэринэн, киин куорат олохтооҕо Татьяна Андреева сүппүтүнэн, холуобунай дьыала тэрилиннэ. Дьахтар сүппүтүн туһунан сайабылыанньа сэтинньи 5 күнүгэр киирбит. Билигин да туох да күттүөннээх информация суоҕун кэриэтэ. Татьяна ханна да барар былаана суоҕа, быстах кэмҥэ тахсан барарыгар дьонун сэрэтэрэ. Сүппүт балаһыанньатын учуоттаан, силиэдэбэтэллэр толору ирдэһиини ыытаары холуобунай дьыаланы арыйарга баһаарбыттар. Криминалист силиэдэбэтэллэр үлэлииллэр.

***

Сэтинньи 6 күнүгэр 46 саастаах Елена Громова сүттэ. Үлэтиттэн тахсыбыт, кыыһыгар эрийэн дьиэтигэр баран эрэрин туһунан (Лермонтов уул.) иһитиннэрбит уонна кэлбэтэх.

*** Сүппүт дьахталлар саастара 19-тан саҕалаан 46 сааска диэри. Бары дьүһүннэрэ атын-атын, омуктара араас-араас. Киин куорат араас оройуоннарыгар сүттүлэр. Маҕаһыыҥҥа тахсан баран өллүлэр, үлэлэриттэн дьиэлээн иһэн сүттүлэр...

Оттон Силиэстийэлиир кэмитиэккэ иһитиннэрбиттэринэн, кыргыттар маассабай сүтүүлэрэ саҕаланна диэн информация оруна суох. Ааспыт икки ый устата 4 дьахтар өлүгэ көстүбүт. Олортон биирдэрэ үөһээ ааттаммыт Инесса Попова – алтынньы 30 күнүгэр сүтэн баран сэтинньи 1-кы күнүгэр өлүгэ булуллубута. Атын үс дьахтар өлүгэ куорат араас оройуоннарыгар булуллубуттар, бэйэ-бэйэлэрин кытта туох да сибээстэрэ суох диэн Следкомҥа иһитиннэрдилэр.

***

Маннык дьулаан сонуннары истэ-истэ, интэриниэккэ кылгас кэм иһигэр элбэх сүппүт кыргыттар хаартыскалара тарҕанарын көрө-көрө, киһи эрэ куттаныах курдук. Чахчы маннык көстүү урут суоҕа дии... Туох-туох буолан эрэрий?

Сонуннар

Ордук ааҕаллар

Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.
Юрий Попов: «Барыта улахан үлэттэн тахсар»
Дьон | 25.11.2022 | 16:00
Юрий Попов: «Барыта улахан үлэттэн тахсар»
Дьокуускайга Тупсарыы үс сыла биллэриллэн, бу диэн эттэххэ, киин куоракка, чахчы, үтүмэн үлэ ыытылынна, ону олохтоохтор даҕаны бэйэҕит көрө-истэ сылдьаҕыт.  Быйыл сайын «Уһук Илиҥҥэ 1000 тиэргэн» федеральнай бырайыагынан Дьокуускай куоракка 75 тиэргэн тупсаран оҥоһулунна. Саамай элбэх эбийиэккэ бэдэрээтчитинэн «Основа» ХЭТ үлэлээтэ. Онон бүгүҥҥү нүөмэрбитигэр бу тэрилтэ эдэр салайааччыта Юрий Поповы...