Кырдьыыны кыйдаабыттар

Дьокуускай куораттааҕы социальнай көмүскэл управлениета, Бэтэрээннэрэ сэбиэттэрэ уонна «Бэтэрээн» кулууп тохсус төгүлүн ыытар киин куорат бэтэрээннэрин быйылгы спартакиадалара хайыһар күрэҕинэн саҕаланна. 

Сайсары эбэҕэ ыытыллыбыт эстафетаҕа куорат аҕыс уокуругуттан уонна биир нэһилиэгиттэн – Тулагыттан – уопсайа иккилии эр киһи уонна иккилии дьахтар састааптаах 9 хамаанда кытыыны ылла. Усулуобуйа быһыытынан, хамаандаҕа 55 саастарыттан үөһэ дьахталлар уонна 60 саастарыттан үөһэ эр дьон туһааннааҕынан 1 км уонна 2 км уһуннаах дистанцияны сүүрдүлэр. 
Күрэхтэһиигэ быйыл 82 хаарын уулларар Михаил Семенович Басов, 81 саастаах Галина Степановна Сыромолотова курдук ытык кырдьаҕастар кыттыбыттара кэрэхсэбиллээх. 
Спартакиада кыттыылаахтарыгар эҕэрдэ тылыгар Дьокуускай куорат Дууматын бэрэссэдээтэлин бастакы солбуйааччы Евдокия Евсикова куорат уопсастыбаннай олоҕор көхтөөх кыттыыны ылар бэтэрээннэргэ туһаайан Саха Өрөспүүбүлүкэтигэр биллэриллибит Үлэ сыла уонна Дьокуускай куоракка «Килбиэннээх үлэ куората” үрдүк аат иҥэриллибитэ аҕа көлүөнэ үтүөлэрин билинии буоларын бэлиэтээтэ. 
Социальнай көмүскэл управлениетын салайааччыта Семен Матвеев үүнэр көлүөнэҕэ холобур биэрэр аҕам саастаах бэтэрээннэргэ махталын биллэрдэ.