Кыайыы болуоссатыгар хапытаалынай өрөмүөн ыытыллыаҕа

Улуу Кыайыы 80 сылыгар бэлэмнэнии салҕанар. Куорат баһылыга Евгений Григорьев салайааччылаах тэрийэр кэмитиэт уочараттаах мунньаҕар Куорат дууматын бэрэссэдээтэлэ Альберт Семенов кыттыыны ылла.
Санатар буоллахха, бу бэлиэ даатанан Дьокуускайга Сэбиэскэй Сойуус Дьоруойдарын аатын сүгэр уулуссаларга, уопсастыбаннай туоналарга тупсарыы, өрөмүөн үлэтэ ыытыллыахтаах. Маны сэргэ былааҥҥа Гериатрия балыыһатыгар киирэр суолу оҥоруу, итиэннэ Кыайыы болуоссатыгар хапытаалынай өрөмүөн киирбиттэр.
Аҕа дойду сэриитин кыттыылаахтарыгар аналлаах мемориальнай дуоскалары инвентаризациялааһын түмүгүнэн 25 дуоска саҥардыллара быһаарыллыбыт. Урут хаһаайына суох 17 эбийиэк, ол иһигэр Аҕа дойду сэриитин кыттыылаахтарыгар, бэтэрээннэригэр аналлаах пааматынньыктар, муниципальнай бас билиигэ бэриллибиттэр.
Биир сүрүн соругунан Кыайыы пааркатын оҥоруу буолар. Бастатан туран манна «Килбиэннээх үлэ куората» стеланы туруоруу, парковканы тэрийии, сценаны саҥардыы, уоту тардыы ыытыллыахтара.
Култуурунай-маассабай уонна спортивнай үлэ былааныгар «Проспект Победы», «Танцующий город» уонна «Стена Победы» саҥа тэрээһиннэр бааллар, Кангалаас – Табаҕа хайысханан сүүрүү о.д.а. киирбиттэр, диэн иһитиннэрэр Олохтоох дьаһалта пресс-сулууспата.