«Куттала суох уонна хаачыстыбалаах суоллар»: 2023 сылга өрөмүөннэнэр эбийиэктэр чопчуланнылар
«Куттала суох уонна хаачыстыбалаах суоллар» национальнай бырайыагынан Дьокуускай куоракка быйыл уопсайа 22 км 626 м усталаах 17 суолга өрөмүөн ыытыллар.
«Главстрой» МХТ куорат Олохтоох дьаһалтатын пресс-сулууспатыгар иһитиннэрбитинэн, 10 эбийиэк оҥоһуллан бүтэр, 7 эбийиэккэ эһиил үлэ салҕанар.
Ол курдук, Ленин проспегын Хабаров уулуссатыттан Краснояров уулуссатыгар диэри кэрчигэр хапытаалынай өрөмүөн түмүктэнэр. Проспект Крупская уулуссатын кытта быһа охсуһар учаастага уустугунан, үлэ муус устар ортотугар былааннаммыт. Манна ириэрииттэн харыстыыр араҥа ууруллуохтаах.
Поярков уулуссатын Дзержинскэй уулуссатыттан Октябрьскай уулуссатыгар диэри кэрчигэ эмиэ түмүктэнэр.
Хапытаалынай өрөмүөн Бабушкин уулуссатын Сэбиэскэй Аармыйа 50 сыла уулуссаттан Очиченко уулуссатыгар диэри кэрчигэр, Бүлүүлүүр суол Лермонтов уулуссатыттан Объездной шоссеҕа (1-кы пусковой комплекс) диэри кэрчигэр, Челюскин уулуссатын Сэбиэскэй Аармыйа 50 сыла уулуссатын Беринг уулуссатыгар диэри учаастагар, Кузьмин (1 учаастак) уонна Островскай уулуссаларыгар, Севернай кыбаарталга уонна Табаҕа бөһүөлэгэр Центральнай уулуссаҕа ыытыллар.
Маны сэргэ, 2023 сылга Винокуров уулуссата Ильменскэй уулуссатыттан Чайковскай уулуссатыгар диэри учаастага уларытан оҥоһуллар.
Быйыл бүппэт, кэлэр сылга көһөр 7 эбийиэк:
– Можайскай уулуссатын Пилоттар уулуссаларыттан Строд уулуссатыгар диэри учаастагын уларыта тутуу;
– Табаҕа бөһүөлэгэр Строительнай уулуссаҕа хапытаалынай өрөмүөн;
– Табаҕа бөһүөлэгэр Комсомольскай уулуссаҕа хапытаалынай өрөмүөн;
– Крафт уулуссатыгар Кульбертинов уулуссатыттан Эргэ Покровскай тракка диэри кэрчигин хапытаалынай өрөмүөнэ;
– Птицефабрика оройуонугар киирэр суоллар, Хомустаах уулуссаҕа элбэх оҕолоохтор кыбаарталлара;
– Тулагы бөһүөлэгин Первомайскай, Совхознай, Строительнай уулуссаларын өрөмүөнэ;
– Сыырдаах бөһүөлэгин Кымньыылаах уулуссата.
Сонуннар
Ордук ааҕаллар
