Куттал суох буолуутун хааччыйыыны күүһүрдүөхтэрэ

Саха сиригэр, Арассыыйа бэрэсидьиэнэ Владимир Путин ыйааҕынан, базовай бэлэм буолуу эрэсиимэ киллэрилиннэ.

 Эрэсиим чэрчинэн өрөспүүбүлүкэҕэ куттал суох буолуутун хааччыйыыны уонна тыын суолталаах эбийиэктэри харабыллааһыны күүһүрдүөхтэрэ.

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрбитинэн, куттал суоһааһынын анаалыстыырга уонна харабыллыыр миэрэлэри бэлэмнииргэ Саха сирин Ил Дархана Айсен Николаев салайааччылаах анал штаб тэрилиннэ. Алтынньы 20 күнүгэр бастакы мунньах ыытылынна.

Санатар буоллахха, дойду бэрэсидьиэнэ Донецкай уонна Луганскай өрөспүүбүлүкэлэргэ, Запорожскай уонна Херсонскай уобаластарга байыаннай балаһыанньаны киллэрэр туһунан ыйаахха илии баттаабыта. Кэккэ регионнарга үрдүк уонна орто таһымнаах бэлэм буолуу эрэсиимнэрэ киирдилэр.