Куораттааҕы архыып быыстапкаҕа ыҥырар

Экспозиция миэстэтэ: куораттааҕы муниципальнай архыып фойета, аадырыһа: Дьокуускай к., Строителлэр уул., 18.

Экспозиция болдьоҕо: 2023 сыл кулун тутар 21 – муус устар 21 күннэрэ.

Быыстапка кулун тутар 21 күнүгэр 15:00 ч. арыллыаҕа.

Ыҥырыылаах ыалдьыттар: СӨ Култуураҕа уонна духуобунай сайдыыга министиэристибэтин салалтата, СӨ Үөрэҕириигэ министиэристибэтэ, Олохтоох дьаһалта, Олохтоох дьаһалта Үөрэҕириигэ управлениета, 2-с №-дээх Национальнай политехническэй оскуола, педагогтар аймахтара, архивистар, информацияны киэҥник тарҕатар сириэстибэлэр.

Быыстапкаҕа аан бастакы төгүлүн 2-с №-дээх Национальнай политехническэй оскуола пуондатын матырыйааллара киэҥ араҥаҕа тахсыахтара – докумуоннар, биллиилээх педагогтар үлэлэрин-хамнастарын туоһулуур хаартыскалар. Ол иһигэр Саха сирин үөрэҕириитигэр улахан кылааттарын киллэрбит педагогтар – РСФСР, САССР оскуолаларын үтүөлээх учуутала, Бочуот Знага уордьан кавалера Кугаевская Тамара Леонидовна, САССР оскуолаларын үтүөлээх учуутала, норуот үөрэҕириитин туйгуна Габышева Аксинья Дмитриевна, САССР оскуолаларын үтүөлээх учуутала, норуот үөрэҕириитин туйгуна, Үлэ Кыһыл Знамятын уордьанын кавалера Оконешникова Прасковья Ивановна тустарынан матырыйааллар бааллар.

Итини сэргэ, «Учууталга ананар…» быыстапкаҕа 1930-с сыллардааҕы сэдэх матырыйааллары, педагогтар аймахтара биэрбит докумуоннарын куопуйаларын көрүөххэ сөп.