Куорат салалтата көҥүлэ суох тутуулары хонтуруоллуур

СӨ Тутууга уонна дьиэҕэ-уокка судаарыстыбаннай хонтуруолга управлениетын салайааччыта Павел Аргунов өр кэмҥэ ситэ тутуллубакка турар эбийиэктэргэ болҕомто уурарын биллэрдэ: “Күрүөлэрэ суох, ким да харабыллаабат, онон кутталы үөскэтэллэр, чуолаан обургу оҕолорго уонна ыччакка”, – диэтэ. Кини Лермонтов уул., 77, Киров уул., 31/5А, Ленин пр., 55/1 аадырыстарга ситэтэ суох, быраҕыллан турар тутуулары ааттаталаата.  

Куораты тутуу уонна тырааныспар инфраструктуратын департаменын начаалынньыгын солбуйааччы Ньургун Пахомов бу аадырыстарга хамыыһыйа тиийэн көрбүтүн, үлэ ыытыллыбытын кэпсээтэ.

«Сир сыһыаннаһыыларын агентствота» муниципальнай хааһына тэрилтэтин салайааччыта Акулина Друзьянова Лермонтов уул. 77-гэр турар сир учаастага быраабы олохтуур докумуона суоҕун бэлиэтээтэ, тутааччыны кытта дуогабар түһэрсиллибэтэҕин кэпсээтэ.   

«Көҥүлэ суох тутууларга миэрэни кытаатыннарыахха наада. Дьокуускай куорат сиригэр-уотугар көҥүлэ суох тутуллубут, дьон олорбот эбийиэктэрин көтүрэри түргэтэтэр санаалаахпыт», — диэтэ Евгений Григорьев.

Түмүккэ киин куоракка көҥүлэ суох тутуу ахсаанын ааҕарга быһаарыныы ылылынна, маныаха олохтоох салайыныы уорганнарын кытыарыахтара.