Куорат сааскы халаан этэҥҥэ ааһарыгар бэлэм

Куорат баһылыга Евгений Григорьев уонна прокурор Антон Николенко Дьокуускай территориятыгар сааскы халаан уутун аһардыыга бэлэмнэниини бэрэбиэркэлээтилэр.  
Куорат баһылыгын солбуйааччы Егор Кардашевскай, Кутталлаах быһыыга-майгыга управление начаалынньыга Николай Егоров, Олохтоох дьаһалта салааларын уонна тэрилтэлэр салайааччылара кыттыылаах көһө сылдьар мунньах бастакы уочарат Даркылаах түөлбэтигэр сырытта. Биллэрин курдук, I-кы уонна II-ис Пристанская уулуссалар сыл аайы кэриэтэ ууга бараллар. Бэрэбиэркэ түмүгүнэн быйыл ыам ыйын ортотун эргин прокуратураҕа Даркылаах оройуонугар сир учаастактарын боппуруоһун көрөргө быһаардылар. 
Ол курдук, бастатан туран, бу сир учаастактарын хаһаайыттарыгар дьиэ-уот сертификаттара бэриллибиттэрин үрдүнэн тоҕо мантан көспөккө олороллорун быһаарарга, ууга барар территорияттан көһөллөрүн курдук үлэни ыытарга сүбэлэстилэр.
Мунньах ити кэнниттэн ВПС-4 уонна ВПС-6 ууну аһардар оборудованиелары көрдө, Намныыр суол Строд уулуссатын учаастагар Мархинка үрэх аннынан ыытыллар уу турбаларын ууруу хаамыытын билистилэр. Үлэни «Дороги Саха» бэдэрээттээх тэрилтэ оҥорор.   
Ити курдук, бүгүҥҥү күҥҥэ киин куорат сааскы халаан уутун көрсөргө бэлэм. Көһө сылдьар мунньах түмүгүнэн прокурор Антон Николенко сааскы халааҥҥа бэлэмнэнии үлэтэ ыытыллыбытын бэлиэтээтэ. Оттон, уу ылар түгэнигэр, нэһилиэнньэни быстах кэмҥэ олордор пууннар тэриллэн тураллар. 
Бэлиэтээн эттэххэ, муус устар 27 күнүгэр баһылык Евгений Григорьев уонна куорат прокурора Антон Николенко куорат соҕуруу эҥэригэр сытар гидротэхиньиичэскэй тутуулары бэрэбиэркэлээбиттэрэ.