Куорат оскуолаларыгар наркоманияны сэрэтэр үлэ ыытыллар
Тохсунньу 23 күнүгэр баһылык Евгений Григорьев куорат Наркотигы утары хамыыһыйатын мунньаҕын ыытта.
Мунньах ааспыт 2023 сылга үөрэх кыһаларыгар наркотигы эмтэн ураты сыалга туһаныыны быһаарар сыаллаах ыытыллыбыт социальнай-психологическай тургутук уонна медицинскэй чуолкайдааһын түмүктэрин уонна үүммүт 2024 сылга орто уонна үрдүк үөрэх кыһаларыгар наркотигынан туһаныыны сэрэтэр тэрээһиннэри дьүүллэстэ.
2023 сылга үөрэх дьыла саҕаланыаҕыттан алтынньы 1 күнүгэр диэри киин куорат 48 оскуолатыгар наркотик буортутун туһунан сэрэтэр тэрээһиннэр ыытыллыбыттар. 2024 сыл тохсунньу ыйыттан тургутук түмүктэринэн медицинскэй чуолкайдааһыннар ыытыллаллар.
Олохтоох дьаһалта Уопсастыбаннай сибээскэ уонна ыччат политикатыгар управлениета быйыл наркоманияны уонна арыгылааһыны утары үлэни орто уонна үрдүк үөрэх кыһаларын устудьуоннарын ортотугар ыытар былааннаах. Маны сэргэ «Кодекс здоровья» интеллектуальнай оонньуу, сэһэргэһиилэр, лиэксийэлэр ыытыллыахтара.
Хамыыһыйа чилиэннэрэ орто уонна үрдүк үөрэх кыһаларын салайааччыларын Дьокуускай куоракка үлэлиир үөрэх кыһаларыгар наркотигы утары ыытыллар үлэ туһунан дакылааттарын иһиттилэр. Ол курдук, М.К. Аммосов аатынан ХИФУ сыл аайы 1 куурус күнүскү үөрэҕин устудьуоннарыгар социальнай-психологическай тургутугу, маны сэргэ «СВФУ против наркотиков» тэрээһини, доруобуйа бэстибээллэрин, устудьуоннар уопсайдарыгар сэрэтэр эриэйдэлэри ыытарын иһитиннэрдилэр. АГАТУ уонна Дьокуускайдааҕы педколледж эмиэ сыллата социальнай-психологическай тургутугу ыыталларын отчуоттаатылар.
Киин куораттааҕы наркотигы утары хамыыһыйа бары үөрэх кыһаларыгар ИДьМ наркотигынан эргиниини хонтуруоллуур управлениетын кытта профилактическэй лиэксийэлэри ыытарга сүбэлээтэ, диэн Олохтоох дьаһалта пресс-сулууспата иһитиннэрэр.
Сонуннар
Ордук ааҕаллар
