Куорат олохтоохторо Өрөспүүбүлүкэ Бырабыыталыстыбатын отчуотун үчүгэйинэн сыаналаатылар
Дьокуускай куорат олохтоохторун иннигэр Өрөспүүбүлүкэ Бырабыыталыстыбытан 2023 сыллааҕы отчуотун Бырабыыталыстыба Бэрэссэдээтэлэ Кирилл Бычков кулун тутар 5 күнүгэр Гагарин аатынан Аныгы култуура уонна искусство киинигэр оҥордо
«Ааспыт сыл федеральнай таһымҥа ылыллар дьаһаллар сөптөөх хайысханан баран иһиллэрин арылхайдфк көрдөрдө. Кытаанах экономическэй санкциялар уонна анал баһыайыаннай дьайыы усулуобуйатыгар түмсүүлээх буолуу – ситиһии сүрүн тирэҕэ буолара билиннэ. Дойдуга бүттүүнүгэр ыарахан кэмҥэ Саха Өрөспүүбүлүкэтэ туох баар күүһүн барытын ууран, дойду салалтатын болҕомтотугар киирдэ, ону кытта Дьокуускай куорат сайдыытыгар улахан кыах бэрилиннэ», – диэтэ Кирилл Бычков.
Ол курдук, 2024 сылга СӨ Бырабыыталыстыбатын былаанынан Саха сиригэр 12 национальнай бырайыагынан 44 региональнай бырайыак олоххо киллэриллэр, ол иһигэр 76 социальнай эбийиэк, 3 муоста. Арассыыйаҕа буола турар Дьиэ кэргэн сылынан дьиэ кэргэн духуобунай сыаннастарын харыстааһыҥҥа уонна дьиэ кэргэн институтун бөҕөргүтүүгэ үгүс үлэ ыытыллыаҕа. Саха Өрөспүүбүлүкэтигэр буола турар Оҕо саас сылынан «Дьиэ кэргэн» хапыталал суумата 300 тыһ. солк. диэри улаатар, «Карта юного жителя Якутии» суумата – 5 тыһ. солк. диэри. Маны сэргэ оҕо сайыҥҥы сынньалаҥар дьоһун болҕомто ууруллара былааннанар.
Отчуокка мустубут дьон Бырабыыталыстыба Бэрэссэдээтэлин иннигэр МРОТ үрдээбитинэн сибээстээн оскуола иннинээҕи тэрилтэлэр педүлэһиттэрин хамнаһын үрдэтии, пилоттары бэлэмниир училищены тутуу, Гагарин уокуругар МФЦ дьиэтин тутуу, 34 №-дээх анал коррекционнай оскуола-интэринээт саҥа дьиэтин тутуу болдьоҕун, социальнай гаастааһын, Петр Алексеев уулуссатыгар «быраҕыллыбыт тутуу» дьылҕатын, «Горпечать» киоскаларын, Сайсары күөл түгэҕин ыраастааһын туһунан ыйытыылары биэрдилэр.
Бырабыыталыстыба отчуотугар куорат баһылыга Евгений Григорьев бэлитээбитинэн, тохсунньу 24 күнүттэн кулун тутар 4 күнүгэр диэри буолан ааспыт Олохтоох дьаһалта 2023 сыллааҕы үлэтинэн 43 отчуот ыытыллыбытын, манна 5200 тахса куорат олохтооҕо кэлэн кыттыбытын, оттон 31 тыһыынчаттан тахса киһи социальнай ситимнэр нөҥүө тэйиччиттэн көрбүтүн-истибитин бэлиэтээтэ.
«Былырыыҥҥытааҕар икки төгүл элбэх киһи кытынна. 727 араас ыйытыы киирдэ. Бу барыта нэһилиэнньэ олорор куоратын сайдыытынан интэриэһиргиирин, үөскүүр кыһалҕалары быһаарарга дьулуһарын көрдөрөр», – диэтэ Евгений Григорьев.
Түмүккэ өрөспүүбүлүкэ киин куоратын олохтоохторо Бырабыыталыстыба 2023 сыллааҕы үлэтин үчүгэйинэн сыаналаатылар, диэн иһитиннэрэр Олохтоох дьаһалта пресс-сулууспата.
Сонуннар
Ордук ааҕаллар
