Куорат дууматын 49-с уочарата суох сессията наҕараадалары анаата уонна биир дьокутаат боломуочуйатын устуммутун ылынна

Куорат дууматын уочарата суох 49-с сессията уопсайа түөрт боппуруоһу көрдө. Бастакынан Ленин проспегын 22/1 дьиэтин истиэнэтигэр тэхиньиичэскэй наука доктара, профессор, РНА чилиэн-кэрэспэдьиэнэ, Ил Түмэн иккис, үһүс ыҥырыыларын дьокутаата Василий Филипповка мемориальнай дуосканы туруорар туһунан быһаарыыны ылыннылар. 

Иккис боппуруоһунан «Дьокуускай иннигэр үтүөлэрин иһин» анал бэлиэнэн наҕараадаланар кандидатуралары көрдүлэр: 72 №-дээх «Кэнчээри» оҕо саадын музыкальнай салайааччыта Ирина Арбатская, Тулагы-Киллэм нэһилиэгин дьаһалтатын ОДьХ боппуруостарыгар сүрүннүүр исписэлииһэ Любовь Баишева уонна «Көмүс күһүн» тыыл уонна үлэ бэтэрээннэрин үҥкүү ансаамбылын уус-уран салайааччыта Августина Москвитина.
Маны сэргэ Дьокуускай куораттааҕы социальнай харалта управлениетын инбэлииттэр дьыалаларыгар салаатын начаалынньыга Анна Сыромятникованы «Дьокуускай куорат нэһилиэнньэтин социальнай харалтатыгар кылаатын иһин» бэлиэнэн наҕараадалыыр туһунан быһаарыыны ылыннылар. 
Салгыы дьокутаат Ольга Саргыдаева бэйэтин баҕатынан боломуочуйатын тохтоторун туһунан боппуруос көрүлүннэ. Куорат дууматын бэрэссэдээтэлэ Альберт Семенов уонна куорат баһылыга Евгений Григорьев Ольга Николаевнаҕа таһаарыылаах үлэтин иһин махталларын биллэрдилэр. Бэлиэтээн эттэххэ, Ольга Саргыдаева Куорат дууматыгар Баайга-дуолга уонна сир сыһыаннаһыыларыгар сис кэмитиэт салайааччыта этэ, Куорат дууматын үһүс уонна төрдүс ыҥырыыларын дьокутаата.